कार्यसूची अघि बढ्न नपाउँदै राष्ट्रिय सभाको बैठक स्थगित

काठमाडौँ । राष्ट्रिय सभाको आजको बैठक कार्यसूचीमा प्रवेश नगर्दै स्थगित भएको छ। बैठकमा प्रस्तुत हुनुपर्ने विषयहरू अघि बढ्न नपाउँदै सांसदहरूको अवरोधका कारण कार्यवाही रोकिएको हो।

बैठकमा नेपाल-भारत सीमा सम्बन्धी विषयमा प्रधानमन्त्री बालेन शाह ले प्रतिनिधि सभामा व्यक्त गरेको भनाइप्रति असन्तुष्टि जनाउँदै विपक्षी सांसदहरूले विरोध जनाएका थिए। सोही कारण बैठकको प्रारम्भिक चरणमै अवरोध उत्पन्न भएको हो।

आजको बैठकमा राष्ट्रपतिको कार्यालयबाट प्राप्त विधेयक प्रमाणीकरणसम्बन्धी पत्रको जानकारी गराउने कार्यक्रम रहेको थियो। साथै, आर्थिक वर्ष २०८३-०८४ का लागि राजस्व तथा व्ययको अनुमानमाथि सामान्य छलफल सुरु गर्ने प्रस्ताव प्रस्तुत गर्ने कार्यसूची पनि तय गरिएको थियो।

त्यसैगरी, प्रतिनिधि सभाबाट सन्देशसहित आएको ‘वैकल्पिक विकास वित्त परिचालन विधेयक, २०८२’ माथि विचार गर्ने प्रस्तावसमेत प्रस्तुत गर्ने तयारी थियो।

सभाका अध्यक्ष नारायणप्रसाद दाहाल ले विपक्षी सांसदहरूलाई कार्यसूची अघि बढाउन पटक-पटक आग्रह गरे पनि अवरोध जारी रहेपछि बैठक सञ्चालन हुन सकेन र अन्ततः स्थगित गरिएको हो।

राष्ट्रिय सभाको अर्को बैठक आगामी जेठ २६ गते मंगलबार दिउँसो १:१५ बजे बस्ने तय भएको छ।