प्रतिनिधि सभामा प्रधानमन्त्रीसँग प्रत्येक महिनाको पहिलो साता प्रत्यक्ष प्रश्नोत्तर हुने

काठमाडौँ । प्रतिनिधि सभामा अब प्रत्येक महिनाको पहिलो साता प्रधानमन्त्रीसँग प्रत्यक्ष प्रश्नोत्तर गर्ने व्यवस्था हुने प्रस्ताव अघि सारिएको छ।

प्रतिनिधिसभा नियमावली मस्यौदा समितिले तयार पारेको प्रतिवेदन आज सभामुख डीपी अर्याल समक्ष पेश गर्दै सो व्यवस्था समावेश गरिएको जानकारी दिएको हो।

प्रस्तावित प्रावधान अनुसार प्रधानमन्त्रीको कार्यक्षेत्रसँग प्रत्यक्ष सम्बन्धित महत्वपूर्ण विषयमा सांसदहरूले प्रश्न उठाउन सक्नेछन्। त्यसका लागि प्रत्येक महिनाको पहिलो साताको कुनै एक दिनको बैठकको एक घण्टा समय छुट्याइने व्यवस्था गरिएको छ। उक्त दिन बैठक बस्न नसकेमा त्यसपछिको पहिलो बैठकमा एक घण्टाको समय प्रधानमन्त्रीसँग प्रश्नोत्तरका लागि तोकिने उल्लेख छ।

नियमावली अनुसार उठाइएका प्रश्नको जवाफ प्रधानमन्त्रीले सोही सदनमा तत्काल दिनुपर्ने व्यवस्था पनि प्रस्ताव गरिएको छ।

यस व्यवस्थाले सरकार प्रमुखलाई संसद्प्रति प्रत्यक्ष रूपमा उत्तरदायी बनाउने उद्देश्य राखिएको मस्यौदामा उल्लेख छ। प्रधानमन्त्री बनेपछि वालेन्द्र शाह (बालेन)हालसम्म संसदमा उपस्थित नभएको सन्दर्भमा यो व्यवस्था महत्वपूर्ण मानिएको छ।