कानून सुधार तथा प्रविधि नियमनमा सहकार्य विस्तारबारे मन्त्री गौतम र राजदूत तोरुबीच छलफल

काठमाडौँ । कानुन, न्याय तथा संसदीय मामिला मन्त्री सोबिता गौतम र नेपालका लागि जापानका राजदूत माएदा तोरुबीच शिष्टाचार भेटवार्ता सम्पन्न भएको छ।

बिहीबार सिंहदरबारस्थित मन्त्रालयमा भएको उक्त भेटमा राजदूत माएदाले मन्त्री गौतमलाई बधाई तथा शुभकामना व्यक्त गरेका थिए। भेटका क्रममा दुवै पक्षबीच द्विपक्षीय सहकार्यका विविध पक्षमा विचार आदानप्रदान गरिएको जनाइएको छ।

छलफलमा कानुन सुधारका क्षेत्रमा हालसम्म भएको सहकार्यलाई निरन्तरता दिने विषयमा जोड दिइएको थियो। साथै, सूचना प्रविधि तथा कृत्रिम बौद्धिकता जस्ता द्रुत गतिमा विकसित भइरहेका क्षेत्रको नियमनका लागि उपयुक्त कानुनी संरचना आवश्यक रहेको विषयमा समेत विचार विमर्श भएको छ।

यसका अतिरिक्त, बदलिँदो अन्तर्राष्ट्रिय राजनीतिक तथा प्रविधिगत परिवेशमा सहकार्यका सम्भावित नयाँ क्षेत्रहरू पहिचान गर्ने विषयमा पनि छलफल केन्द्रित भएको मन्त्रालय स्रोतले जनाएको छ।

भेटवार्तामा जापान सरकारलाई आवश्यक पर्ने कुनै पनि विषयमा नेपाल पक्ष छलफलका लागि तयार रहेको सन्देशसमेत आदानप्रदान गरिएको मन्त्री गौतमको सचिवालयले जानकारी दिएको छ।