विश्वकपका लागि इरानलाई अमेरिकामा स्वागत र सुरक्षाको पूर्ण ग्यारेन्टी छ: ह्वाइट हाउस

एजेन्सी । अमेरिकामा यसै वर्ष आयोजना हुन लागेको फिफा विश्वकप फुटबल प्रतियोगितामा सहभागी हुन आउने इरानी राष्ट्रिय टोलीलाई पूर्ण स्वागत गरिने र उनीहरूको सुरक्षाको समेत सुनिश्चितता रहेको ह्वाइट हाउसले जनाएको छ।

ह्वाइट हाउसको विश्वकप कार्यदलका प्रमुख एन्ड्र्यु जिउलियानीले इरानी टोलीको सुरक्षाबारे उत्पन्न संशयलाई चिर्दै यस्तो बताएका हुन्। टेक्सासमा आयोजित 'कन्जरभेटिभ पोलिटिकल एक्सन कन्फरेन्स' का क्रममा बीबीसीसँग कुरा गर्दै जिउलियानीले अमेरिकाले इरानी टोलीको आगमनको अपेक्षा गरिरहेको स्पष्ट पारे। उनले इरानी टोलीको उपस्थिति अमेरिकामा बसोबास गर्ने ठूलो संख्याका इरानी समुदायका लागि आफ्नो देशको गौरव र संस्कृतिको उत्सव मनाउने एउटा विशेष अवसर हुने विश्वास व्यक्त गरे।

विश्वकपको तय तालिका अनुसार इरानका समूह चरणका खेलहरू लस एन्जलस र सियाटलमा हुनेछन्। यद्यपि, इरानी खेलकुद मन्त्रालयले आफ्ना खेलाडीहरूलाई शत्रु राष्ट्रमा हुने प्रतियोगितामा सहभागी हुन प्रतिबन्ध लगाएको खबरहरू सार्वजनिक भइरहँदा अमेरिकाको यो स्पष्टीकरण आएको हो।

यसअघि पूर्व राष्ट्रपति डोनाल्ड ट्रम्पले 'ट्रुथ सोसल' मा एक पोस्ट गर्दै सुरक्षाको कारण देखाएर इरानी टोली अमेरिका आउनु उचित नहुने धारणा राखेपछि विवाद उत्पन्न भएको थियो। ट्रम्पको उक्त टिप्पणीपछि इरानी अधिकारीहरूले आफ्ना खेलहरू मेक्सिकोमा सार्न फिफालाई आग्रह गरेका थिए, तर फुटबलको सर्वोच्च निकाय फिफाले उक्त प्रस्ताव अस्वीकार गरिदिएको थियो।

विश्वकप सुरु हुन अब ७७ दिन मात्र बाँकी रहँदा जिउलियानीले अमेरिकाको आन्तरिक सुरक्षा विभाग (डीएचएस) को कामकाज ठप्प हुनुले खेलको तयारीमा अवरोध पुर्‍याउन सक्ने भन्दै चिन्ता व्यक्त गरे। उनले विश्वकपलाई सुरक्षित र भव्य रूपमा सम्पन्न गर्नका लागि सुरक्षा निकायहरूको पूर्ण सक्रियता आवश्यक रहेकोमा जोड दिएका छन्।