यी चार दलले समानुपातिकमा एक हजार मत पनि पाउन सकेनन्

काठमाडौँ । प्रतिनिधि सभा निर्वाचन अन्तर्गत समानुपातिकतर्फको मत गणना अन्तिम चरणमा पुगेको छ । निर्वाचन आयोगका अनुसार समानुपातिकतर्फ अहिलेसम्म एक करोड ४ लाख ४३ हजार २७२ सदर मत गणना भइसकेको छ ।

प्रत्यक्षतर्फ पहिलो रहेको राष्ट्रिय स्वतन्त्र पार्टी समानुपातिकतर्फ पनि पहिलो छ । समानुपातिकतर्फ रास्वपाले ५० लाख १४ हजार ८९१ मत प्राप्त गरिसकेको छ । समानुपातिकतर्फ चार वटा दलले अहिलेसम्म एक हजार मत कटाउन सकेका छैनन् । निर्वाचन आयोगका अनुसार अहिलेसम्म जनप्रिय लोकतान्त्रिक पार्टीले ९०० मत प्राप्त गरेको छ ।

यस्तै, मितेरी पार्टी नेपालले ७४८, उन्नत लोकतन्त्र पार्टीले ७०७ र त्रिमुल नेपाल पार्टीले ६६९ मत प्राप्त गरेको छ ।

समानुपातिकतर्फ ५७ राजनीतिक दल सूचीकृत छन् । तीमध्ये रास्वपा नेपाल, नेपाली काँग्रेस, नेकपा एमाले, नेपाली कम्युनिस्ट पार्टी, श्रम संस्कृति पार्टी र राष्ट्रिय प्रजातन्त्र पार्टीले जारी मतगणनामा थ्रेस होल्ड अर्थात् कम्तीमा ३ प्रतिशत मत कटाएका छन् ।