रास्वपाका उम्मेदवार साहको उम्मेदवारी खारेज, आयोगले दियो यस्तो स्पष्टीकरण

काठमाडौँ । निर्वाचन आयोगले धनुषा-१ क्षेत्रका उम्मेदवार किशोरी साहको उम्मेदवारी खारेज गरिएको कारण सार्वजनिक गरेको छ।

आयोगका अनुसार उम्मेदवारले आफ्नो व्यक्तिगत विवरण सत्य नबुझाएको र आवश्यक जानकारी लुकाएको पाइएपछि कानुन अनुसार उम्मेदवारी कायम राख्न नसकिने निष्कर्षमा पुगेको हो।

निर्वाचन तयारीसम्बन्धी पत्रकार सम्मेलनमा कार्यवाहक प्रमुख निर्वाचन आयुक्त रामप्रसाद भण्डारीले जानकारी दिँदै, उम्मेदवारको विरुद्ध उजुरी परेको, आयोगले सम्बन्धित निकायसँग सोधपुछ गर्दा उनी कालोसूचीमा रहेको तथ्य भेटिएको र त्यसैले उम्मेदवारी खारेज गर्नुपर्ने अवस्था आएको बताए।

भण्डारीले उजुरीको पूर्ण अनुसन्धानपछि उम्मेदवारलाई आफ्नो पक्ष राख्न पर्याप्त समय दिइएको भए पनि उनी प्रमाण पेश गर्न असफल भएको स्पष्ट पारे।

त्यसैगरी, पक्राउ परेका अन्य उम्मेदवारहरूको अवस्था पनि आवश्यक अनुसन्धान र कानुनी प्रक्रिया पूरा गरी कारबाही अघि बढाइने आयोगले जानकारी दिएको छ।