राष्ट्रिय समस्या समाधानपछि मात्रै निर्वाचनमा जानुपर्नेमा पूर्वराजा ज्ञानेन्द्र शाहको जोड

काठमाडौँ। पूर्वराजा ज्ञानेन्द्र शाहले देशका विद्यमान राष्ट्रिय चुनौतीहरूको समाधानमा सहमति कायम नगरी निर्वाचन प्रक्रियातर्फ अघि बढ्न नहुने बताएका छन्।

राष्ट्रिय प्रजातन्त्र दिवसका अवसरमा जारी भिडियो सन्देशमार्फत उनले वर्तमान अवस्थालाई गम्भीर रूपमा लिनुपर्ने उल्लेख गर्दै मुलुक कठिन परिस्थितिमा पुगेको दाबी गरेका हुन्। देशमा द्वन्द्व, अस्थिरता र राजनीतिक खिचातानी बढ्न नदिन राष्ट्रिय सहमतिका आधारमा अगाडि बढ्नुपर्ने आवश्यकता उनले औँल्याएका छन्।

उनले मुलुकको अस्मिता नै चुनौतीमा परेको अवस्था रहेको भन्दै विगतका विभिन्न राजनीतिक परिवर्तनले राष्ट्र र नागरिकलाई के उपलब्धि गरायो भन्ने विषयमा आत्ममूल्यांकन आवश्यक रहेको बताएका छन्।

समाजमा आपसी द्वेष र टकरावको प्रवृत्ति हटाउनुपर्ने आवश्यकता औँल्याउँदै उनले अधिकारप्रति मात्र केन्द्रित हुने र कर्तव्यबोधलाई बेवास्ता गर्ने प्रवृत्ति बढिरहेको टिप्पणी पनि गरेका छन्।