एमाले कार्यकर्ताको मनोबलमा गिरावट, नयाँ दलको प्रभाव घट्दो: अग्नि सापकोटा

काठमाडौँ । नेपाली कम्युनिस्ट पार्टी (नेकपा) का प्रवक्ता अग्निप्रसाद सापकोटाले प्रमुख प्रतिपक्ष दल नेकपा (एमाले) का कार्यकर्ता विगतको तुलनामा यसपटक आत्मरक्षात्मक अवस्थामा देखिएको दाबी गरेका छन्।

पार्टी नेतृत्वको कार्यशैली र रणनीतिक कमजोरीका कारण यस्तो परिस्थिति सिर्जना भएको उनको भनाइ छ।

आगामी निर्वाचनको तयारी सन्दर्भमा पार्टीको आधिकारिक सामाजिक सञ्जालमार्फत सार्वजनिक गरिएको भिडियो सन्देशमा प्रवक्ता सापकोटाले नेकपाले देशभर १६४ निर्वाचन क्षेत्रमा उम्मेदवारी दर्ता गराएपछि कार्यकर्ता पंक्तिमा उत्साह र आत्मविश्वास बढेको उल्लेख गरेका छन्।

उनले संगठन विस्तार र जनसम्पर्क अभियान प्रभावकारी रूपमा अघि बढाइएकाले सकारात्मक परिणाम आउने विश्वास व्यक्त गरेका छन्।

सापकोटाले पछिल्लो समय उदाएका राजनीतिक दलहरूको प्रभाव क्रमशः घट्दो अवस्थामा रहेको पनि टिप्पणी गरेका छन्।

विशेष गरी काठमाडौँलगायत सहरी क्षेत्रमा ती दलहरूको लोकप्रियता कम हुँदै गएको उनको आकलन छ। अल्पकालीन प्रचारमुखी गतिविधि र प्रियतावादले दीर्घकालीन राजनीतिक स्थायित्व नदिने धारणा उनले व्यक्त गरेका छन्।

उनले नेकपा जनाधार विस्तार गर्दै क्रमशः स्थापित हुँदै गएको दाबी गर्दै निर्वाचन परिणामले पार्टीको संगठनात्मक उपस्थिति थप सुदृढ हुने अपेक्षा व्यक्त गरेका छन्।