जीवनरक्षक औषधिको अभाव न्यूनीकरण गर्न न्यूनतम मौज्दात व्यवस्था लागू गर्ने तयारी

काठमाडौँ । बजारमा बेलाबेलामा देखिने अत्यावश्यक औषधिको अभावलाई नियन्त्रण गर्न औषधि व्यवस्था विभागले न्यूनतम मौज्दात (मिनिमम स्टक) कायम गर्ने व्यवस्था लागू गर्ने तयारी थालेको छ।

विभागका अनुसार विशेष गरी क्यान्सर उपचारमा प्रयोग हुने औषधि, दुर्लभ रोगका औषधि तथा अन्य जीवनरक्षक औषधिको आपूर्ति नियमित बनाउन यस्तो व्यवस्था अघि सारिएको हो।

उत्पादन, आयात तथा मूल्य निर्धारणसँग सम्बन्धित विभिन्न कारणले समय-समयमा केही औषधिको आपूर्तिमा समस्या देखिने गरेको विभागले जनाएको छ। विशेष गरी दुर्लभ रोगको उपचारमा प्रयोग हुने ‘अर्फान ड्रग्स’ को व्यावसायिक माग कम हुने भएकाले उत्पादक तथा आयातकर्ताले उत्पादन वा आयातमा पर्याप्त प्राथमिकता नदिँदा अभाव सिर्जना हुने अवस्था रहेको विभागको विश्लेषण छ।

यस्ता औषधिको प्रयोग निरन्तर नहुने भए पनि आवश्यक परेको समयमा उपलब्ध नहुँदा बिरामीको जीवन नै जोखिममा पर्न सक्ने भएकाले न्यूनतम मौज्दात सुनिश्चित गर्ने व्यवस्था आवश्यक ठानिएको विभागले जनाएको छ।

उक्त व्यवस्था कार्यान्वयनका लागि विभागले स्वास्थ्य सेवा विभाग, विभिन्न अस्पताल तथा सम्बन्धित निकायसँग समन्वय गरिरहेको जनाएको छ। साथै, सीमित दर्ता भएका जीवनरक्षक औषधिको सूची तयार गरी ती औषधिको स्वदेशमै उत्पादन बढाउने वा नियमित आयात सुनिश्चित गर्ने दिशामा पनि आवश्यक तयारी भइरहेको विभागले उल्लेख गरेको छ।