जाडो याममा ग्यास संकटः उपत्यकामा फेरि पुरानै दृश्य

काठमाडौं। काठमाडौं उपत्यकामा पछिल्लो दुई सातादेखि खाना पकाउने ग्यास (एलपी ग्यास) को अभाव देखिएको छ । विशेष गरी नेपाल ग्यास ब्राण्डको अभावका कारण उपभोक्ताहरू मारमा परेका छन् । उपत्यकामा नेपाल ग्यासको बजार हिस्सा सबैभन्दा बढी रहेकोले यो अभावले धेरै परिवारको दैनिकी प्रभावित भएको छ । बजारमा विक्री केन्द्रहरूमा ग्यास नपाइएपछि उपभोक्ताहरू खाली सिलिण्डर बोकेर बालाजु औद्योगिक क्षेत्रमा रहेको नेपाल ग्यासको कार्यालयमै पुग्ने गरेका छन् । दैनिक सयौंको संख्यामा उपभोक्ता त्यहाँ लाइन लागेको देखिन्छ । कार्यालयबाट अहिले डिपोमा नयाँ ग्यास नआए पनि एक जनालाई एक सिलिण्डर उपलब्ध गराएर पठाइरहेको बताइएको छ । अभावको मुख्य कारण भारतबाट समयमै ग्यास ढुवानी नहुनु रहेको छ । ढुवानीकर्ता (ट्रक चालकहरू) सँगको केही असमझदारीका कारण धादिङ क्षेत्रमा ग्यास रोकिएको र सहमति भएपछि बजारमा आपूर्ति सहज हुने अपेक्षा गरिएको छ । जाडो मौसममा ग्यासको माग १०–२५ प्रतिशतसम्म बढ्ने गरेको छ । जसले समस्या थप जटिल बनेको छ । नेपाल आयल निगमले भने बजारमा ग्यासको कुनै अभाव नरहेको स्पष्ट पारेको छ । निगमकाअनुसार जाडोयामको माग धान्न पर्याप्त कोटा निर्धारण गरिएको छ । उपभोक्ताहरूले भने बजारमा वास्तविक अभाव महशुस गरिरहेका छन् । विक्रेताहरूले पनि ढुवानी र उपलब्धताका कारण समस्या रहेको बताएका छन् । निगमले अनावश्यक भण्डारण (होर्डिङ) नगर्न र हल्लाको पछि नलाग्न आग्रह गरेको छ । अबको केही दिनमा ढुवानी सहज भएपछि बजार सामान्य हुने अपेक्षा गरिएको छ । तर उपभोक्ताहरूले तत्काल राहत पाउन सकेका छैनन् ।