कांग्रेसका महाधिवेशन प्रतिनिधि ‘खोसाखोस’ !

काठमाडौं । नेपाली कांग्रेसमा पार्टीका महामन्त्रीद्दयले विशेष महाधिवेशन आह्रवान गरेपछि महाधिवेशन प्रतिनिधि तानातानमा परेका छन् ।

संस्थापन पक्ष (देउवा समुह) ले विशेष महाधिवेशन ब्यक्ति विशेषलाई बोलाउने अधिकार नभएको र त्यसरी बोलाइएको विशेष महाधिवेशन वैधानिक नहुने तर्क गरिरहेका बेला महामन्त्रीद्दयले भन विधानले नै महामन्त्रीलाई त्यस्तो अधिकार दिएको तर्क गरिरहेका छन् ।

विधानको ब्याख्या र अधिकार क्षेत्रका विषयमै कांग्रेसमा सस्थापन र महामन्त्रीद्दयका वीचमा मतभेद भएको छ । अहिले महामन्त्रीद्दयले आह्रवान गरेको पुस २७ र २८ गतेको विशेष महाधिवेशनमा सहभागी हुन संस्थापन इतरले प्रतिनिधिहरुलाई आग्रह गरेका छन् । 

संस्थापन पक्षले विशेष महाधिवेशनमा सहभागी नहुन र महामन्त्रीद्दयले सहभागी हुन अपिल गरिरहँदा महाधिवेशन प्रतिनिधिहरु भने तानातानमा परेका छन् । संस्थापन पक्षले विशेष महाधिवेशन अस्वीकार गर्दै प्रतिनिधिहरूलाई काठमाडौं आउनबाट रोक्ने रणनीतिमा लागेको छ । अर्कोतिर महामन्त्री गगन थापा र विश्वप्रकाश शर्मा नेतृत्वको समूह  जसरी पनि विशेष महाधिवेशनमा बहुमत प्रतिनिधि ल्याएर सफलतापूर्वक सम्पन्न गर्ने  योजनामा  छ ।

यो द्वन्द्वको सबैभन्दा ठूलो मार भने ४ हजार ७४३ जना महाधिवेशन प्रतिनिधि माथि परेको छ । अहिले कांग्रेसका प्रतिनिधिहरू नेतृत्वको शक्ति संघर्षको चेपुवामा परेका छन् । कोही फोन, कोही दबाब, कोही प्रलोभन, कोही भावनात्मक आग्रहबीच ‘काठमाडौं जाने कि नजाने’ भन्ने कठिन दुविधामा छन् ।

गत असोज २८ गते ५४ प्रतिशत (२,४३९ जना) महाधिवेशन प्रतिनिधिले विशेष महाधिवेशन माग गर्दै केन्द्रीय कार्यालयमा हस्ताक्षर बुझाएका थिए । त्यसपछि त्यही विधानको ब्यवस्थाका आधारमा  गगन थापा र विश्वप्रकाश शकर्माले विशेष महाधिवेशन आह्रवान गरेका हुन् । 

यही शक्ति संघर्षका कारण अहिले कांग्रेसका महाधिवेशन प्रतिनिधि ‘तानातान’ मा परेका छन् ।