लुम्बिनी राजधानी क्षेत्रमा सरकारी गाडी चलाउन स्थानीयले लगाए रोक

काठमाडौँ । लुम्बिनी प्रदेशको राजधानी क्षेत्रमा स्थानीयले सरकारी गाडी सञ्चालनमा रोक लगाएका छन् ।

अमेरिकाको एमसीसी परियोजना अन्तर्गत एमसीए नेपालले दुई लेनमा स्तरोन्नति गर्न लागेको धानखोला-लमही सडक खण्ड चार लेनमा बिस्तारको माग गर्दै स्थानीयले सरकारी गाडी सञ्चालनमा रोक लगाएका हुन् ।

धानखोला-लमही चार लेन सडक निर्माण संघर्ष समितिका संयोजक प्रकाश शाहीले माग सम्बोधन नभएसम्म आज पुस ७ गतेदेखि यो महिनाभर प्रदेश राजधानी क्षेत्रमा सरकारी गाडी चलाउन नदिने बताएका छन् ।

शाहीको नेतृत्वमा केही युवाहरू लुम्बिनी प्रदेश राजधानी गेट, राप्ती गाउँपालिका-३ स्थित प्रदेश प्रशासनिक केन्द्र मुख्य प्रवेश क्षेत्रमा भेला भएर प्रदर्शन गरिरहेका छन् ।

लुम्बिनी प्रदेशको राजधानी दाङको देउखुरी क्षेत्रमा प्रस्तावित दुई लेनको धानखोला-लमही सडक खण्डमा एमसीसी परियोजना अन्तरगत एमसीए नेपालले साबिकको ७ मिटर चौडा सडकलाई दायाँ-बायाँ २.५/२.५ मिटर थपेर १२ मिटर मात्र सीमित गरी उही २ लेनकै सडक बनाउन खोजेको भन्दै स्थानीय विरोधमा छन् ।

मन्त्री कुलमान घिसिङसँग कुरा गर्दै राप्ती गाउँपालिका अध्यक्ष प्रकाश विष्ट यसअघि राप्ती गाउँपालिका अध्यक्ष प्रकाश विष्ट स्थानीय संघर्ष समितिका प्रतिनिधिसहित काठमाडौँ आएर भौतिक पूर्वाधार, यातायात र सिँचाइ मन्त्रालयको जिम्मेवारी सम्हालेका कुलमान घिसिङलाई ज्ञापन पत्र बुझाएर माग सम्बोधनका लागि पहल गरिदिन अनुरोध गरेका थिए ।

तर एमसीसी परियोजना अनुसार काम हुन लागेकाले यसमा आफूहरूले भने अनुसार नहुने जवाफ कुलमानले दिएका थिए ।