गुण्डागर्दीमुक्त चितवन, शान्ति सुरक्षामा प्रहरीको प्रभावकारी भूमिका

चितवन। चितवन जिल्लामा पछिल्लो समय गुण्डागर्दीका गतिविधिहरू पूर्ण रूपमा नियन्त्रणमा आएको छ। चितवन प्रहरीले अपराध नियन्त्रण तथा शान्ति सुरक्षालाई सुदृढ बनाउने उद्देश्यले सञ्चालन गरेका विशेष अभियानका कारण जिल्लामा गुण्डागर्दी शून्य अवस्थामा पुगेको प्रहरी स्रोतले जनाएको छ।

जिल्लाभर नियमित गस्ती, सघन चेकजाँच, सूचनामा आधारित कारबाही तथा समुदाय–प्रहरी साझेदारी कार्यक्रम प्रभावकारी रूपमा लागू गरिँदा आपराधिक गतिविधिहरूमा उल्लेखनीय कमी आएको हो। विशेष गरी सार्वजनिक स्थल, बजार क्षेत्र तथा संवेदनशील स्थानहरूमा सुरक्षा व्यवस्था कडा पारिएको छ।

चितवन प्रहरीले आगामी दिनमा पनि शान्ति, सुरक्षा र अमनचयन कायम राख्न निरन्तर निगरानी तथा अभियानलाई थप प्रभावकारी बनाउने जनाएको छ। यससँगै सर्वसाधारणलाई कुनै पनि शंकास्पद गतिविधि देखेमा नजिकको प्रहरी कार्यालयमा जानकारी गराउन आग्रह गरिएको छ।