रौतहटमा ट्रक र कार ठोक्किँदा वृद्धको मृत्यु, दुई जना घाइते

रौतहट । रौतहटको चन्द्रपुर नगरपालिका–४ अन्तर्गत पूर्व–पश्चिम राजमार्गको पश्चिम पहिलो लचक नजिक ट्रक र कार ठोक्किँदा एक जनाको मृत्यु भएको छ भने दुई जना घाइते भएका छन्।

जिल्ला ट्राफिक प्रहरी प्रमुख इन्स्पेक्टर राजेन्द्र थापा मगरका अनुसार बागमती प्रदेश ०३–००१ ख ११४८ नम्बरको ट्रक र बा ३ च ६१९३ नम्बरको कार एक–अर्कालाई ओभरटेक गर्ने क्रममा बिहान ७ः५० बजे ठोक्किँदा कारमा सवार करिब ८०–९० वर्षका बारा नीजगढ घर भई नाम नखुलेका एक वृद्धको घटनास्थलमै मृत्यु भएको छ। मृतकको आफन्तहरू लाई खबर गरिएको छ उनीहरू पुगेपछि नाम र वतन खुल्ने इन्स्पेक्टर मगरले जानकारी दिएका छन्।

दुर्घटनामा कार चालक बारा निजगढका करिब ३० वर्षीय दिनेश थपलिया र चन्द्रपुर–६ का २० वर्षीय डोरमणि सापकोटा घाइते भएका छन्। थपलियाको टाउको र अनुहारमा चोट लागेको छ भने सापकोटालाई बाहिरी चोट नलागे पनि छाती दुख्ने समस्या रहेको प्रहरीले जनाएको छ।

उक्त घटनापछि ट्रक चालक मकवानपुर, हेटौँडा–७ का ५३ वर्षीय श्यामबहादुर तितुङलाई प्रहरीले नियन्त्रणमा लिएर थप अनुसन्धान अघि बढाइएको जिल्ला ट्राफिक प्रहरी कार्यालय चन्दरनिगाहपुरले जनाएको छ।