लुम्बिनीविरुद्ध पहिला ब्याटिङ गर्दै काठमान्डु

काठमाडौँ। काठमान्डु गोर्खाजले नेपाल प्रिमियर लिग (एनपीएल) क्रिकेटको इलिमिनेटरमा पहिला ब्याटिङ गर्ने भएको छ ।

काठमान्डुका कप्तान करण केसीले बुधबार त्रिवि क्रिकेट अन्तर्राष्ट्रिय मैदान कीर्तिपुरमा टस जितेर लुम्बिनी लायनसविरुद्ध आफै पहिला ब्याटिङ गर्ने निर्णय गरेका हुन् ।

यस खेल जित्ने टोलीले बिहीबार क्वालिफायर २ मा विराटनगर किंग्ससँग खेल्ने छ र विजेता टोलीले सुदूरपश्चिम रोयल्ससँग उपाधिका लागि शनिबार प्रतिस्पर्धा गर्नेछ ।

काठमान्डुले अघिल्लो खेल खेलेको टोलीबाट कुनै खेलाडी परिवर्तन गरेको छैन । लुम्बिनीले सुमित महर्जनको स्थानमा दिनेश अधिकारीलाई खेलाएको छ । प्रतियोगितामा यो उनको दोस्रो खेल हो । चितवन राइनोजविरुद्धको खेलमा उनी टोलीमा रहे पनि ब्याटिङ र बलिङ भने गरेका थिएनन् ।

लिगचरण पश्चात काठमान्डु १० अंक जोडी तेस्रो स्थानमा रहेको थियो । लुम्बिनी ८ अंकसहित चौथो स्थानमा रहेको थियो । लिगचरणमा काठमान्डुले लुम्बिनीलाई २२ रनले पराजित गरेको थियो । गत वर्ष पनि काठमान्डुले लुम्बिनीलाई १८ रनले पराजित गरेको थियो ।