बारा तनाव : जेनजीका माग ३ दिनभित्र सम्बोधन गर्ने सहमति

बारा । जेनजी र स्थानीय प्रशासनबीच पथलैया स्थित शसस्त्र प्रहरी बल प्राविधिक तालिम केन्द्रमा भएको छलफलमा मागहरू ३ दिनभित्र सम्बोधन गर्ने सहमति भएको छ। प्रमुख जिल्ला अधिकारी धर्मेन्द्रकुमार मिश्र, सुरक्षा निकायका प्रमुखहरू र जेनजी तर्फबाट सम्राट उपाध्याय नेतृत्वको टोली सहभागी भएको छलफलमा घटनामा संलग्न व्यक्तिहरूलाई कारबाही, घाइतेको निःशुल्क उपचार तथा क्षतिपूर्ति, जेनजी कार्यकर्ताको सुरक्षा सुनिश्चितता, सुरक्षा व्यवस्थापनमा लापरबाही गर्ने अधिकारीमाथि कारबाही र अरविन्द साहको कल डिटेलसहित अनुसन्धान अघि बढाउनुपर्ने माग राखिएको थियो।

वार्तामा सहभागी जेनजी अगुवा सुदन गुरुङ र पुरुषोत्तम यादवले आफूहरूमाथि योजनाबद्ध रूपमा हातपात भएको दाबी गर्दै दोषी जो कोही भए पनि कडा कारबाही गर्न आग्रह गरे। जिल्ला प्रहरी कार्यालयका एसपी सन्तोष तमाङले उजुरीका आधारमा कसुरदारको खोजी भइरहेको र पीडितलाई कानुनी व्यवस्था अनुसार उपचार तथा क्षतिपूर्ति उपलब्ध गराइने बताए।

प्रमुख जिल्ला अधिकारी मिश्रले जेनजीका मागहरूप्रति प्रशासन गम्भीर रहेको भन्दै सकेसम्म चाँडो समाधानमा अघि बढ्ने आश्वासन दिएका छन्।