जेनजी आन्दोलनमा सुरक्षा निकायको भूमिकामाथि गम्भीर प्रश्न, उच्चस्तरीय छानबिनको माग गर्दै पर्‍यो निवेदन

काठमाडौं । गत भदौ २३ र २४ गते काठमाडौं उपत्यकामा भएको जेनजी आन्दोलनका क्रममा सुरक्षा निकायको भूमिकामाथि गम्भीर प्रश्न उठेको छ । आन्दोलन नियन्त्रणमा सुरक्षाकर्मीको निष्क्रियता र केही शङ्कास्पद गतिविधिहरूलाई लिएर पीडित प्रहरी कर्मचारीका नाममा उच्चस्तरीय जाँचबुझ आयोगमा छानबिनको माग गर्दै निवेदन परेको हो ।

निवेदनमा भदौ २४ गते नयाँ बानेश्वरस्थित संसद भवनमाथि आन्दोलनकारीले आक्रमण गर्दा सुरक्षाकर्मीहरूले कुनै प्रतिक्रिया नजनाई आगजनी गर्न दिएको घटनालाई विशेष रूपमा उठाइएको छ । यस्तो संवेदनशील अवस्थामा पनि कर्फ्यु आदेश जारी भए पनि नेपाली सेना परिचालित नहुनुलाई शङ्कास्पद भनिएको छ । यसबाहेक, प्रहरीले हतियार लुट्न दिई सर्वसाधारणको पहुँचमा पुर्‍याएको र यसले देशलाई गृहयुद्धको खतरामा धकेलेको गम्भीर आरोप पनि निवेदनमा लगाइएको छ ।

निवेदनमा तत्कालीन प्रधानमन्त्री, गृहमन्त्री, आईजीपी, एआईजीपी लगायतका उच्च अधिकारीहरूले घटनाको जिम्मेवारी लिनुपर्ने माग गरिएको छ । साथै, राष्ट्रिय स्वतन्त्र पार्टीका कार्यवाहक अध्यक्ष डिपी अर्याल लगायतका विभिन्न अधिकारी र प्रहरीको मिलेमतोमा रवि लामिछानेलाई नख्खु कारागारबाट निकाल्न खोजिएको आशङ्का पनि व्यक्त गरिएको छ ।

यस घटनाले नेपालको राष्ट्रिय सुरक्षा, शान्ति सुव्यवस्था र संवैधानिक प्रक्रियामाथि गम्भीर चुनौती खडा गरेको विज्ञहरूको भनाइ  छ। निवेदनमा उठाइएका विषयहरूको निष्पक्ष छानबिन गरी दोषीमाथि कारबाही गर्न र भविष्यमा यस्ता घटना दोहोरिन नदिन आवश्यक कदम चाल्न माग गरिएको छ ।