फ्लोरिडामा ट्रम्पलाई मार्न खोजेको आरोपमा एक व्यक्ति दोषी ठहर

एजेन्सी । गत वर्ष सेप्टेम्बरमा फ्लोरिडाको एक गल्फ कोर्समा राष्ट्रपति डोनाल्ड ट्रम्पको हत्या प्रयास गरेको अभियोगमा रायन रौथ दोषी ठहर भएका छन्।

५९ वर्षीय रौथलाई राष्ट्रपतिका एक प्रमुख उम्मेदवारको हत्या प्रयास र विभिन्न बन्दुकसम्बन्धी अपराधलगायत सबै आरोपमा अदालतले दोषी ठहर गरेको हो।

यो घटना सन् २०२४ सेप्टेम्बर १५ मा भएको थियो, जब तत्कालीन राष्ट्रपतिका उम्मेदवार ट्रम्प वेस्ट पाम बिचमा रहेको आफ्नै गल्फ कोर्समा गल्फ खेलिरहेका थिए। यो ठाउँ उनको मार-ए-लागो निवासबाट करिब १५ मिनेटको दूरीमा छ।

अमेरिकी गुप्तचर सेवाका एक एजेन्टले झाडीबाट राइफलको नाल बाहिर निस्केको देखेपछि गोली चलाए। त्यसपछि, राइफल समातेको व्यक्ति, जसलाई पछि रौथको रूपमा पहिचान गरियो, घटनास्थलबाट भागेका थिए । उनलाई केही बेरमै नजिकैबाट पक्राउ गरियो।

सीबीएस न्यूजका अनुसार फैसला सुनाएपछि रौथले आफैँलाई हानि पुर्‍याउने प्रयास गरे। अमेरिकी मार्सलहरूले हस्तक्षेप गर्नुअघि उनले कलमले आफैँलाई छुरा हान्ने प्रयास गरेको बताइएको छ।

फैसला आएलगत्तै एक सामाजिक सञ्जाल पोस्टमा ट्रम्पले कानुन प्रवर्तन निकाय र रौथको गिरफ्तारीमा सहयोग पुर्‍याउने एक साक्षीलाई धन्यवाद दिएका छन्।

ट्रम्पले रौथबारे भनेका छन्, ‘उनी एक दुष्ट व्यक्ति थिए जसको दुष्ट मनसाय थियो। यो अमेरिकी न्यायका लागि धेरै ठुलो क्षण हो!’
महान्यायाधिवक्ता पामेला बोन्डीले भनिन्, ‘यो हत्याको प्रयास हाम्रो राष्ट्रपतिको मात्र नभई हाम्रो राष्ट्रमाथिकै आक्रमण थियो।’