गभर्नर पौडेलको गुनासो-‘छात्रवृत्ति बचत गरेर बनाएको घर पनि जलाएपछि शरणार्थी बन्नुपर्‍यो’

काठमाडौँ। जेन जेड आन्दोलनको सिकार नेपाल राष्ट्र बैंक गभर्नर प्रा. डा. विश्वनाथ पौडेललाई पनि बनाइएको छ ।

आफूले पाएको छात्रवृत्ति बचत गरी निर्माण गरेको घरमासमेत आगजनी गरेर शरणार्थी बनाइएको भन्दै उनले दुःख व्यक्त गरेका छन् ।

जेन जेड आन्दोलन उग्र भए पनि निसानामा सरकारी कार्यालय तथा राजनीतिक दलका नेता तथा कार्यकर्ता परेका छन् । साथै, सार्वजनिक पद धारण गरेका व्यक्तिका सम्पत्तिमा समेत प्रदर्शनकारीले तोडफोड र आगजनी गरेको थिए।

सिंहदरवारसहित अधिकांश सरकारी कार्यालय तथा राजनीतिक दलका नेता तथा कार्यकर्ताको घर तोडफोड र आगजनीमा उत्रिए । सोही क्रममा गभर्नर पौडेल पनि ‘टार्गेट’ मा परेका थिए ।

गभर्नर पौडेलले आफ्नो घर जलेको भिडियो सामाजिक सञ्जालमा सार्वजनिक गर्दै उनको परिवार ‘शरणार्थी’ हुन बाध्य पारिएको गुनासो गरेका छन् ।