लामाका मन्त्री नियुक्त नगरे बागमतीका मुख्यमन्त्री बानियाँलाई पर्न सक्छ संकट

काठमाडौं । आफ्नै पार्टीका मुख्यमन्त्रीलाई सत्ताच्यूत गरेर मुख्यमन्त्री बनेका कांग्रेस बागमती प्रदेश कार्यसमितिका सभापति समेत रहेका मुख्यमन्त्री इन्द्र बानियाँलाई फेरि संकट आइलागेको छ । निवर्तमान मुख्यमन्त्री बहादुरसिंह लामाले मुख्यमन्त्री बानियाँलाई विश्वासको मत दिनु अगाडी सभापति शेरवहादुर देउवासामु भएको सहमति बानियाँले पालना गर्नुपर्ने शर्त तेस्र्याएका छन् । लामाले आफुपक्षका तीन नेतालाई मन्त्री बनाउने सहमति बानियाँले उल्लंघन गरेकोले उनलाई विश्वासको मत दिनु अगाडी सहमति कार्यान्वयन गर्नुपर्ने दवाव बढाएका छन् । बानियाँले मंगलबार विश्वासको मत लिने योजना बनाएक छन् । त्यसका लागि शनिबार कांग्रेस प्रदेश संसदीय दलको बैठकले आफना सांसदहरुलाई बानियाँको पक्षमा विश्वासको मत दिन ह्वीप जारी गरेको छ ।

सत्ता सहयात्री एमालेले पनि आफना सांसदलाई ह्वीप लगाएको छ । सत्तामा रहेका कांग्रेस र एमालेले ह्वीप अनुसार बानियाँलाई विश्वासको मत दिएमा सरकार टिक्नेछ । यी दुई पार्टीका सांसदको संख्या ६४ छ । सरकार टिकाउन बहुमतका लागि बानियाँलाई प्रदेश सभाका ५६ सांसदको समर्थन आवश्यक छ । कांग्रेसका ३७ र एमालेका २७ सांसद छन् । विपक्षमा रहेको माओवादी केन्द्रको २१, राष्टिय प्रजातन्त्र पार्टीको १३, एकीकृत समाजवादीको ७, नेपाल मजदुर किसान पार्टीको ३ र हाम्रो नेपाल पार्टीको २ सांसद छन् । तर कांग्रेसभित्रको आन्तरिक किचलोले मुख्यमन्त्री बानियाँ अप््ठ्यारोमा परेका छन् । बहादुरसिंह लामा पक्षले आज दिउँसो आफु पक्षका सांसदहरुको बैठक बोलाएको छ । सहमति पालना नगरेसम्म बरु सभापति देउवालाई गएर सामुहिक राजीनामा बुझाउने तर ह्वीप नमान्ने अडानमा लामा पक्ष रहेको छ । लामासँग बागमनी कांग्रेसमा १४ सांसद छन् । कथंकदाचित लामा पक्षले बानियाँलाई विश्वासको मत दिएन भने उनीसँग बहुमत हुनेछैन । लामा पक्ष समेटिएन भने बानियाँसँग आफु पक्षका कांग्रेसका २३ र एमालेको २७ सांसद मात्र रहनेछन् । त्यसो गर्दा उनीसँग जम्मा ५० सांसदको मात्र साथ रहनेछ ।

कांग्रेसको लामा समुहले साथ नदिए बहुमतका लागि अन्य ६ सांसद बानियाँलाई पुग्ने छैन । त्यसो हुँदा बानियाँ नेतृत्वको सरकार एक सातामै ढल्ने जोखिम छ । लामा पक्ष विश्वासको मत लिनु अगाडी नै बानियाँले देउवाको रोहबरमा भएको सहमति अनुसार आफु पक्षका तीन सांसदलाई मन्त्री बनाउनु पर्ने अडानमा छ । लामाले आफु बर्हिगमनमा पर्नु अगाडी आफुले नियुक्त गरेका तीन जनालाई बानियाँले मन्त्री बनाउनु पर्ने माग गरेपछि देउवाको रोहबरमा बानियाँसँग सहमति भएको दावी गदै आएको छ । तर बानियाँले उक्त सहमति पालना नगरेको लामा पक्षले आरोप लगाउँदै आएको छ । ‘हामी आज सांसदहरुका बीचमा छलफल गरेर पार्टी सभापतिज्यूलाई भेट्न जाने तयारी छ। उहाँसँग बसेर हाम्रो रणनीति सुनाउनेछौँ। उहाँ सकारात्मक हुनुभयो र हाम्रो माग कार्यान्वयन गराउन मुख्यमन्त्रीलाई निर्देशन दिनुभयो, माग सम्बोधन भएर तीन मन्त्री नियुक्त गरियो भने बानियाँलाई विश्वासको मत दिन्छौँ। नत्र सभापतिलाई राजीनामापत्र बुझाएर फर्कन्छौँ’, लामा पक्षका सांसद गणेश लम्सालले भने ।

लामा पक्षले कोशीमा केदार कार्कीले पनि विद्रोह गरेरै मुख्यमन्त्री केही समय चलाएको उदाहरण पार्टीभित्रै रहेकोले बागमतीमा पनि नयाँ शिराबाट राजनीति अगाडी बढ्न सक्ने चेतावनी बानियाँलाई दिईरहेको छ । बानियाँ भने अहिलेसम्म लामाको मागमा सकारात्मक देखिएका छैनन । उनले देउवाको सामु भएको सहमति कार्यान्वयन गर्ने नगर्ने विषयमा मौन बसेका छन् । बानियाँलाई उनका पक्षका कांग्रेसका सांसदले लामा पक्षलाई समेटेर होइन, आफुहरुलाई सहभागी गराएर सरकार विस्तार गर्न दवाव बढाईरहेका छन् । लामा पक्षले चाल्ने रणनीतिले बानियाँको सत्ता निरन्तरता या संकटको टुंगो लाग्ने देखिएको छ ।