युएई पठाइदिन्छु भन्दै ठगी गर्ने दुई जना पक्राउ

काठमाडौँ । वैदेशिक रोजगारीमा आकर्षक तलबको प्रलोभनमा पारी युएई पठाइदिन्छु भन्दै रकम ठगी गरेको अभियोगमा दुई जनालाई प्रहरीले पक्राउ गरेको छ ।

पक्राउ पर्नेहरूमा म्याग्दी जिल्ला घर भएका हाल ललितपुरमा बस्ने ३६ वर्षीय नर बहादुर बुढाथोकी र पाँचथर फिदिम नगरपालिका-१ घर भएका हाल काठमाडौँ टोखामा बस्दै आएको ४६ वर्षीय उमेश हिङमाङ रहेका छन् ।

प्रहरीका अनुसार नर बहादुरले युएई पठाइदिन्छु भन्दै १ जनाबाट १ लाख रुपैयाँ र उमेशले २ जना पीडितहरूबाट ११ लाख ५९ हजार रुपैयाँ लिई सम्पर्कविहीन भएको थियो ।उनीहरू सम्पर्कविहीन भएपछि पीडितले दिएको उजुरीको आधारमा काठमाडौँ उपत्यका अपराध अनुसन्धान कार्यालय टेकुबाट खटिएको प्रहरीले काठमाडौँबाट पक्राउ गरेको हो ।

हाल उनीहरूलाई नियन्त्रणमा लिइ आवश्यक अनुसन्धान तथा कारवाहीको लागि वैदेशिक रोजगार विभाग ताहाचल काठमाडौँ पठाइएको प्रहरीले जनाएको छ ।