पार्टी फुट्ने हल्ला भ्रमको खेती मात्रै हो, महाधिवेशनबाट पुनर्गठन हुन्छ: जनार्दन शर्मा

काठमाडौँ । नेकपा (माओवादी केन्द्र)का उपमहासचिव जनार्दन शर्माले पार्टी फुट्ने कुरा भ्रामक भएको बताएका छन्। उनले यस्ता प्रचारबाट सचेत रहन कार्यकर्तालाई आग्रह समेत गरे।

पार्टीभित्र देखिएका वैचारिक अस्पष्टता, राजनीतिक अन्योल र सांगठनिक अराजकतालाई आगामी विशेष महाधिवेशनमार्फत समाधान गरिने र पार्टीलाई पुनर्गठन गरिने उनको भनाइ थियो।

मंगलबार सामाजिक सञ्जालमा लेख्दै नेता शर्माले पार्टीभित्र र बाहिरबाट लगातार फुटको प्रचार भइरहेकोप्रति आपत्ति जनाए।

‘विगत दुई वर्षदेखि माथिल्लो तहबाटै लगातार पार्टी फुट्छ भन्ने गरिएको प्रचारलाई यतिबेला थप मलजल गरिँदै छ,’ उनले लेखेका छन्, ‘पार्टी कार्यकर्ता र जनतामा भ्रमको खेती गर्नेहरू प्रति सचेत हुन आग्रह गर्दछु।’