काठमाडौं । राष्ट्रिय प्रजातन्त्र पार्टीले नयाँ– पुराना सबै भ्रष्टाचारको छानबिन र कारबाहीको माग गर्दै अख्तियार दुरुपयोग अनुसन्धान आयोगमा ज्ञापन पत्र बुझाएको छ ।शुक्रबार राप्रपा अध्यक्ष राजेन्द्र लिङदेन समेत नेताकार्यकर्ताहरु दलबलसहित अख्तियारको केन्द्रीय कार्यालय टङ्गाल पुगेर ज्ञापन पत्र बुझाएका हुन् ।
देशमा भ्रष्टाचार महामारीको रुपमा फैलिँदै गएको भन्दै राप्रपाले सबै भ्रष्टाचारका काण्डहरुमाथि पुन: र व्यापक छानबिन गर्न तथा राजनीतिक नेतृत्व तहलाई उन्मुक्ति नदिन माग गरेको छ ।
अख्तियारका प्रमुख आयुक्त प्रेम कुमार राईलाई बुझाईएको ज्ञापनपत्रमा केन्द्र, प्रदेश, स्थानीय तहका बीच भ्रष्टाचारका लागि प्रतिस्पर्धा देखिएको राप्रपाले उल्लेख गरेको छ ।‘अहिले भ्रष्टाचार कहाँ कहाँ छ होइन, कहाँ चाहिँ छैन भनेर खोज्नुपर्ने परिस्थिति निर्माण भएको छ’, ज्ञापनमा भनिएको छ ।
सुडान घोटाला, ललिता निवास, वाइडबडी, क्यान्टोन्मेन्ट, ओम्नी, एनसेल लगायतका ठूला भ्रष्टाचारका काण्डहरुमा राजीनतिक नेतृत्वको छानबिनको दायरा पर्नुले आयोगको निष्पक्षता र प्रभावकारिताको भन्दै अख्तियारमाथि नै राप्रपाले प्रश्न उठाएको छ ।
‘भ्रष्टाचार गरेर खानु आमाको रगत खानु सरह हो भन्ने मान्यतामा राष्ट्रिय प्रजातन्त्र पार्टीको दृढ विश्वास छ र हामी सधैं भ्रष्टाचार र भ्रष्टचारजन्य क्रियाकलापको विरुद्धमा छौं’, ज्ञापनमा भनिएको छ ।
पछिल्ला नक्कली भुटानी शरणार्थी, सहकारी ठगी, रड सिमेन्ट लगायत निर्माण सामग्रीको अप्रत्यासित मूल्यवृद्धि तथा हालैका भिजिट भिसा र मन्त्रीहरुको अडियो प्रकरण विश्व समुृदायमा बदनाम गर्ने प्रतिनिधि घटना भएका राप्रपाको ठहर छ ।
यस्तै पोखरा अन्तर्राष्ट्रिय विमानस्थल, गौतमबुद्ध अन्तर्राष्ट्रिय विमानस्थल, मणिपाल मेडिकल, चाइनिज विमान खरिद काण्ड, खर्बौं कृषि अनुदानको दुरुपयोग लगायतका प्रकरणमा अनुसन्धान तथा कारबाहीमा ढिलासुस्ती भइरहेको भन्दै आफ्नो ध्यानाकर्षण भएको राप्रपाले जनाएको छ ।
‘..नयाँ पुराना लगायत सबै भ्रष्टाचार काण्डहरुमाथि पुन: व्यापक छानबिन गर्न तथा राजनीतिक नेतृत्व तहलाई उन्मुक्ति नदिन राष्ट्रिय प्रजातन्त्र पार्टी माग गर्दछ’, अख्तियारलाई राप्रपाले शुक्रबार बुझाएको ज्ञापनपत्रमा उल्लेख छ ।
प्रतिक्रिया दिनुहोस
सफल खबर संवाददाता
शुक्रबार, ०२ साउन २०८२, १५ : २१
लेखकबाट थप
सम्बन्धित समाचारहरु
पीएसओ खोसिएकोबारे राप्रपाले गर्यो सभामुखको ध्यानाकर्षण
राप्रपाका तीन सांसदको पीएसओ फिर्ता
राप्रपाको प्रदर्शन सकियो, पार्टी कार्यालयमा आकस्मिक बैठक
ज्ञानेन्द्र शाहीलगायतका राप्रपा सांसदहरूलाई संसदीय दल कार्यालयबाट निस्किन रोक
निषेधित क्षेत्र तोड्दै आन्दोलन चर्काउने राप्रपा प्रयास
राप्रपा केन्द्रीय कार्यसम्पादन समिति बैठक बस्दै