अहिलेको संघीय संरचना भत्काउनुपर्छ: उपेन्द्र यादव

काठमाडौँ । जनता समाजवादी पार्टी, नेपालका अध्यक्ष उपेन्द्र यादवले समानतामा आधारित प्रणाली नभएसम्म लोकतान्त्रिक गणतन्त्रको अर्थ नरहेको बताएका छन्।

दलित, पिछडा वर्ग, थारु, मुस्लिम, आदिवासी र अल्पसंख्यक समुदायको केन्द्रीय परिसंघले शनिबार काठमाडौँमा आयोजना गरेको कार्यक्रममा यादवले यस्तो बताएका हुन्। उनले प्रदेशहरूको संरचना घुमाइघुमाइ बनाइएको जिकिर गरे। उनले ८ वटा जिल्ला मात्रै मधेस नभएको बताए।

उनले बाँकी सबै ६ प्रदेशमा कम संख्या भएको समुदायको हालीमुहाली हुने गरी संघीयता बनाइएको बताए। यो संरचनागत विभेल भएको जिकिर गरे।

उनले नेपालमा प्रदेशहरूको आकार पहिचान र सामर्थ्यका आधारमा हुनुपर्ने बताए। उनले लोकतन्त्रलाई समावेशी लोकतन्त्र नबनाएसम्म, लैंगिक असमानता र विभेद अन्त्य नगरेसम्म मुलुकमा शान्ति, स्थिरता, विकास र समृद्धि प्राप्त नहुने बताए।

त्यसैले अहिलेको संघीयता संरचना भत्काउनुपर्ने उनले बताए। अहिलेको संरचनामा सबै भाषाहरूलाई समानताका साथ मान्यता नदिइएको, दलित र गैरदलितको भेदभावको अन्त्य गर्न नसक्ने भएकाले अहिलेको संरचना भत्काउन जरुरी रहेको उनको भनाइ थियो।