शुभांशुसँगै १ अर्ब ४० करोड भारतीयको आशा अन्तरिक्षमा गइरहेको छ: प्रधानमन्त्री मोदी

काठमाडाैं। भारतीय प्रधानमन्त्री नरेन्द्र मोदीले शुभांशु शुक्लासँगै १ अर्ब ४० करोड भारतीयको शुभकामना, आशा र आकांक्षा समेत अन्तरिक्षमा गइरहेको बताएका छन् । 

बुधबार भारत, हंगेरी, पोल्यान्ड र संयुक्त राज्य अमेरिकाका अन्तरिक्ष यात्रीहरूलाई बोकेर अन्तरिक्षमा प्रक्षेपण गरिएको मिसनलाई शुभकामना दिँदै प्रधानमन्त्री मोदीले यस्तो बताएका हुन् । मोदीले​ शुक्लासहित सम्पूर्ण अन्तरिक्ष यात्रीहरूको सफलताको कामना समेत गरेका छन् ।

भारतीय वायु सेनाका समूह कप्तान शुभांशु शुक्ला ४० वर्षपछि अन्तर्राष्ट्रिय अन्तरिक्ष केन्द्र (आईएसएस) यात्रा गर्ने पहिलो भारतीय बनेका छन् । उनले स्पेसएक्सको ड्र्यागन विमानमार्फत प्रक्षेपण गरिएको अक्सियम–४ मिसनका लागि अन्तरिक्ष यात्रा गरेका हुन् ।

शुक्ला नेतृत्वको अन्तरिक्षयान बुधबार (२०२५ जुन २५) दिउँसो १२:०१ बजे सफलतापूर्वक प्रक्षेपण भएको छ । विभिन्न प्राविधिक कारणले पटकपटक स्थगित गरिएको उडान यसपटक सफल भएको हो ।

उत्तर प्रदेशको राजधानी लखनउमा १९८५ अक्टोबर १० मा जन्मिएका शुक्ला हाल भारतीय अन्तरिक्ष अनुसन्धान संगठन (इसरो)को गगनयान मिसनका लागि छनोटमा परेका चार अन्तरिक्ष यात्रीमध्ये एक हुन् ।

भारतीय वायुसेनाको लडाकु स्क्वाड्रनमा २००६ जुनमा नियुक्त भएका शुक्लासँग सु–३० एमकेआई, मिग–२१, मिग–२९, जगुआर, हक, डोर्नियर र एन–३२ जस्ता विभिन्न विमान उडाएको गरी २,००० घण्टाभन्दा बढीको उडान अनुभव छ । उनी अनुभवी युद्ध नेतृत्वकर्ता तथा परीक्षण पाइलट पनि हुन् ।

शुक्लासँगै अमेरिकी अन्तरिक्ष यात्री तथा मिसन कमान्डर पेगी ह्विटसन, पोल्यान्डका स्लावोस उज्नान्स्की विश्वनेव्स्की र हंगेरीका तिबोर कापु अक्सियम–४ मिसनमा सहभागी छन् । 

प्रक्षेपणअघि शुभांशु शुक्लाले आफ्नो मिसनले भारतका युवाहरूलाई प्रेरणा मिल्ने आशा व्यक्त गरेका थिए । उनले भनेका थिए, ‘यदि मेरो कथाले एक जनाको जीवन परिवर्तन गर्न सके पनि, त्यो मेरो लागि ठूलो सफलता हुनेछ ।’