प्रहरीले सार्वजनिक गर्‍यो पाठक पक्राउ पुर्जीबारे सूचना

काठमाडौं l नेपाल प्रहरीको साइबर ब्यूरो, भोटाहिटीले  दिल भुषण पाठकविरुद्ध पक्राउ पुर्जी जारी भएको सूचना सार्वजनिक गरेको छ।

नेपाल प्रहरी प्रधान कार्यालय, साइबर ब्यूरोबाट जारी सूचनाअनुसार जिल्ला झापा स्थायी घर भई हाल काठमाडौंको धुम्बाराहीमा बसोबास गर्दै आएका पाठकमाथि विद्युतीय कारोबार ऐन, २०६३ अन्तर्गत कसूर लागेको उल्लेख छ।

यस सम्बन्धमा नेपाल सरकार वादी भई साइबर ब्यूरो ५९ (२०८१/८२) को जाहेरी अनुसार काठमाडौं जिल्ला अदालतले २०८२ जेठ २७ गते मुलुकी फौजदारी कार्यविधि संहिता, २०७४ को दफा ९ को उपदफा ३ अनुसार पक्राउ अनुमति दिएको जानकारी गराइएको छ।

प्रहरीले पाठकलाई छिटोभन्दा छिटो साइबर ब्यूरो भोटाहिटी वा नजिकको प्रहरी कार्यालयमा उपस्थित भई अनुसन्धानमा सहयोग गर्न आग्रह गरेको छ।

साइबर अपराधसँग सम्बन्धित मुद्दाहरूमा प्रहरीको सक्रियता बढिरहेको अवस्थामा यो पुर्जी सार्वजनिक गर्नुले हालैका दिनमा सामाजिक सञ्जाल तथा डिजिटल माध्यममार्फत हुने गैरकानुनी गतिविधिमा नियन्त्रण गर्न प्रहरीले चालेको कदमको एक झलक दिन्छ।

प्रहरीले सूचना सार्वजनिक गर्दै फोन नं. ०१–५३१९०४४ वा मोबाइल नं. ९८५१२८६७७० मार्फत थप जानकारी लिन सकिने जनाएको छ।