नेपाल प्रहरीको डीएसपी हुँ भन्दै ठगी गरेको आरोपमा दुई जना पक्राउ

काठमाडौँ । नेपाल प्रहरीको डीएसपी हुँ भन्दै ठगी गरेको आरोपमा प्रहरीले बुधबार दुई जनालाई पक्राउ गरेको छ ।

पक्राउ पर्नेमा काभ्रेपलान्चोकको चौरी देउराली–८ बस्ने वर्ष ४५ वर्षीय ज्ञान बहादुर लामा भन्ने ज्ञानु तामाङ र सुनसरीको इटहरी उपमहानगरपालिका-४ पाँचघरे घर भई कलंकी बस्ने ४२ वर्षीय रेवती ओझा रहेका छन् । उनीहरूले प्रहरी हिरासतमा रहेको मानिसको मुद्दा मिलाइदिने भन्दै छ लाख रुपैयाँ ठगी गरेको प्रहरीको भनाई छ ।

ज्ञानु तामाङ २०७० फागुन २० गते हात हतियार खरखजाना सम्बन्धी कसुरमा ५ वर्ष जेल सजाय भुक्तान गरेको, २०७० वैशाख १६ गते काठमाडौँ जिल्ला, जिल्ला प्रहरी परिसर टेकु, काठमाडौँबाट सार्वजनिक अपराध कसुरमा र २०६७ कात्तिक ४ गते जुवा सम्बन्धी कसुरमा मुद्दा चलेको देखिएको छ ।

दुवैलाई पक्राउ गरी काठमाडौँ जिल्ला अदालतबाट ५ दिनको म्याद थप गरी अनुसन्धान भइरहेको जिल्ला प्रहरी परिसर काठमाडौँले जानकारी दिएको छ।