अमेरिका र चीनबिच हुने व्यापार सम्झौतासम्बन्धी बैठकबारे ट्रम्पले के भने ?

वासिङ्टन डीसी । अमेरिकी राष्ट्रपति डोनाल्ड ट्रम्पले व्यापार सम्झौताको सम्बन्धमा अमेरिका र चीनका नेताहरूबिच हुने भनिएको बैठकबारे जानकारी दिएका छन् ।

शनिबार उनले आफ्नो सामाजिक सञ्जाल ट्रुथ सोसियलमा लेखे, ‘मलाई यो जानकारी गराउन पाउँदा खुसी लागेको छ कि अमेरिकी वित्त सचिव स्कट बेसेन्ट, वाणिज्य सचिव हावर्ड लुटनिक र व्यापार प्रतिनिधि जेमिसन ग्रीरले जुन ९, २०२५ सोमबार लन्डनमा चिनियाँ प्रतिनिधिहरूलाई भेट्नेछन्। यो बैठक व्यापार सम्झौताको बारेमा हुनेछ।’

यो बैठकको घोषणा हुनुभन्दा अघि शुक्रबार डोनाल्ड ट्रम्प र चिनियाँ राष्ट्रपति सी जिनपिङबिच व्यापारका विषयमा टेलिफोन वार्ता भएको थियो । यो फोन वार्तापछि अमेरिकी राष्ट्रपति ट्रम्पले आफूले चीन भ्रमणको योजना बनाएको बताए। उनले सी जिनपिङलाई अमेरिका भ्रमणको निम्तो दिएको पनि जानकारी दिए।

वास्तवमा, दुवै देशले एकअर्कालाई व्यापार सम्झौता उल्लङ्घन गरेको आरोप लगाइरहेका छन्। यो सम्झौताको उद्देश्य दुई देशहरू बिच लगाइएको कर घटाउनु थियो।  यस वर्षको फेब्रुअरीमा ट्रम्पले धेरै देशहरूमा कर लगाए, तर सबैभन्दा बढी कर चीनबाट आउने सामानहरूमा लगाइएको थियो। प्रतिक्रियामा चीनले पनि अमेरिकी सामानहरूमा भारी कर लगायो, जसले दुई देशहरू बिचको व्यापार युद्धलाई अझ बढाएको थियो।

यसपछि, मे महिनामा, दुवै देशले व्यापार सम्झौताको बारेमा जेनेभामा बैठक गरे। यस व्यापार सम्झौता अन्तर्गत अमेरिकाले चीनबाट आयात हुने सामानमा लाग्ने भन्सार १४५ प्रतिशतबाट घटाएर ३० प्रतिशत पुर्‍याएको थियो भने चीनले अमेरिकी सामानमा लाग्ने भन्सार १२५ प्रतिशतबाट घटाएर १० प्रतिशत पुर्‍याएको थियो।