मेरिबेक सिटी काउन्सिल अष्ट्रेलिया र भरतपुर महानगरबीच भगिनी सम्बन्ध स्थापना हुने

काठमाडौं । अष्ट्रेलियाको भिक्टोरियास्थित मेरिबेक सिटी काउन्सिलले नेपालकाे भरतपुर महानगरपालिकासँग औपचारिक भगिनी सम्बन्ध स्थापना गर्ने निर्णय गरेको छ । यो निर्णयसँगै अष्ट्रेलियामा पहिलोपटक कुनै स्थानीय सरकारमार्फत नेपालसँग औपचारिक भगिनी सम्बन्ध स्थापनाको बाटो खुलेको भिक्टोरियामा कार्यरत नेपालका लागि अवैतनिक वाणिज्यदूत निराजन गौलीले बताए ।

गौलीले नेपाली वाणिज्यदूत कार्यालयको पहलमा यो सहकार्य सम्भव भएको उल्लेख गर्दै भने, ‘नेपाली समुदायको लागि सुखद खबर हो र यो सुरुवातबाट अझ धेरै सम्भावनाहरू खोज्नेछौं।’

गौलीका अनुसार मेरिबेकका मेयर हेलेन डेभिडसन, काउन्सिलरहरू र बोर्ड सदस्यहरूले काउन्सिलर क्रिस माइल्सद्वारा प्रस्तुत प्रस्तावलाई एकमतले पारित गरेका हुन्। आवश्यक प्रारम्भिक तयारीहरू सम्पन्न भएपछि औपचारिक बैठकहरूका लागि पत्राचार सुरु हुने र वाणिज्यदूत कार्यालयले दुवै सहरबीच समन्वयको भूमिका निर्वाह गर्ने जनाएको छ।

यो सहकार्यले शिक्षा, पर्यटन, संस्कृति, स्थानीय प्रशासन र सामाजिक एकताको क्षेत्रमा दीर्घकालीन साझेदारीको ढोका खोल्ने अपेक्षा गरिएको उनले बताए । मेरिबेक क्षेत्र, विशेषगरी ग्लेनरोयमा उल्लेख्य संख्यामा नेपाली समुदाय बसोबास गर्छन् ।