रिहा भएलगत्तै धवलशमशेर राणा किन जान लागे भारत ?

काठमाडौँ । नेपालमा राजसस्था पूर्नस्थापना र हिन्दु राज्य निर्माणको लागि आन्दोलन थालेको राप्रपाका महामन्त्री धवलशम्शेर राणा २४ दिन प्रहरी हिरासतमा बसेर आइतबार साँझ रिहा भएका छन् ।

उनलाई गत चैत १५ गते काठमाडौंको तिनकुनेमा राजावादीहरुले गरेको हिंसात्मक अराजकतामा उक्साएको आरोपमा प्रहरीले सोही राती पक्राउ गरेको थियो ।

उक्त घटनामा दुई जनाको ज्यान गएको थियो भने कयौं घाइते भएका थिए । केही घर जले भने लुटपाटसम्मका घटना भएका थिए । यही घटनामा राप्रपाका महामन्त्री समेत रहेका धवलशम्शेर जवरा र उपाध्यक्ष रविन्द्य्र मिश्र लगायतका नेता समेत पुगेर आन्दोलनकारीलाई उक्साउने काम गरेका थिए ।

प्रहरीले खोजेको बेला उपस्थित हुने शर्तमा राणालाई आइतबार बेलुकी हिरासतमुक्त गरेको थियो । बाँकेबाट प्रतिनिधीसभामा प्रतिनिधित्व समेत गरेका राणा हिरासतमुक्त भए लगत्तै भारत जाने तयारीमा लागेका छन् ।

भारतको उत्तरप्रदेश सरकारका मुख्यमन्त्री योगी आदित्यनाथले नेपालमा राजासहितको हिन्दुराज्यको वकालत गरिरहेको र नेपालको अस्थिर राजनीतिमा जहिल्यै मौकाको फाइदा उठाउन लागि पर्ने भारतको रवैया रहिरहेका बेला नेपालमा राजावादीहरुको आन्दोलनमा भारतको भूमिका के ? भन्ने प्रश्न उठिरहेको छ ।

यही बेला राजावादी आन्दोलनका एक नेता धवलशम्शेर प्रहरी हिरासतबाट मुक्त भए लगत्तै भारत जाने तयारीमा लागेका हुन् । उनको भ्रमणलाई विशुद्द स्वास्थ्य उपचारका लागि हुन लागेको राप्रपाका नेताहरुको भनाई छ ।

उनी क्यान्सरबाट पिडित रहेको र त्यसैको उपचार विगतमा पनि उतै भएको र फलोअपका लागि जान लागेको राप्रपाका नेता जनकराज पाठकले जानकारी दिएका छन् । उनलाई उपचारकै लागि प्रहरीले खोजेको बेला उपस्थित हुने गरी रिहा गरिदिएको पनि बताइएको छ ।

राणाले मुम्बईमा क्यान्सरको उपचार गराइरहेका थिए । त्यसैको फलोअपका लागि केही दिनमै त्यसतर्फ फलोअप उपचारमा जान लागेको नेता जनकराज पाठकले जानकारी दिए । उनको केही महिनाअघि गिजाको क्यान्सरको उपचार भएको थियो भने त्यसको फलोअप निरन्तर गराइरहेका छन् ।

उनको फलोअपका लागि डाक्टरहरुले वैशाख १५ गतेको समय दिएको बताइएको छ ।