भारतका ऊर्जामन्त्री नेपाल भ्रमणमा आउने

काठमाडौँ । ऊर्जा, जलस्रोत तथा सिञ्चाईमन्त्री दीपक खड्काको निमन्त्रणामा भारतका केन्द्रीय ऊर्जा एवम् आभास तथा सहरी विकास मन्त्री मनोहरलाल खट्टर नेपाल आउने भएका छन् । गत माघ ३० गते भारत भ्रमणका क्रममा मन्त्री खड्काले भारतका ऊर्जा मन्त्री खट्टरलाई नेपाल भ्रमणको निमन्त्रणा गरेका थिए ।

मन्त्री खड्काको निमन्त्रणमा वैशाख ९ गते मङ्गलवार बिहान दुई दिने भ्रमणका लागि उनी नेपाल आउन लागेको मन्त्रालयले बताएको छ । मन्त्री खट्टरले वैशाख ९ गते दिउँसो भारत सरकारको सहयोगमा निर्माण सम्पन्न भएको कोशी करिडोर २२० केभी प्रसारण लाइनअन्तर्गत इनरुवा–वसन्तपुर–बानेश्वर–तुम्लिङटार २०० केभी प्रसारण लाइन तथा २२०/१३३/३३ केभी तुम्लिङटार सवस्टेशन, २२०/३३ केभी बानेश्वर सवस्टेशन र २२०/१३३/३३ केभी वसन्तपुर सव स्टेशनको संयुक्त रूपमा सङ्खुवासभाको तुम्लिङटार सवस्टेशनमा उद्घाटन गर्ने कार्यक्रम रहेको छ । 

सोही दिन भारतले निर्माण गरेको अरुण तेस्रो जलविद्युत आयोजनाको पावर हाउस तथा बाँध क्षेत्रको अवलोकन गर्नेछन् । सोही दिन दुई देशले संयुक्त रूपमा निर्माण गर्न लागेको प्रसारण लाइन निर्माणका लागि स्थापना गरिएको कम्पनीको सम्झौता पत्रमा हस्ताक्षर हुनेछ ।

वैशाख १० गते भारतका विद्युतमन्त्री खट्टरले मुस्ताङको मुक्तिनाथको अवलोकन भ्रमण गर्ने कार्यक्रम रहेको छ । सोही दिन उनले प्रधानमन्त्री केपी शर्मा ओली र उपप्रधानमन्त्री एवम् सहरी विकास मन्त्री प्रकाशमान सिंहसँग शिष्टाचार भेटघाट गर्ने कार्यक्रम तय भएको छ । विद्युतमन्त्री खट्टरले सोही दिन साँझ पशुपतिनाथको दर्शन गरेर स्वदेश फर्कने कार्यक्रम रहेको मन्त्रालयले जनाएको छ ।