पश्चिम नवलपरासीबाट १२ लाख रुपैयाँसहित २ जना पक्राउ

बुटवल। १२ लाख रुपैयाँसहित पश्चिम नवलपरासीबाट दुई जना पक्राउ परेका छन् ।दुई वटा भारतीय मोटरसाइकलमा आउँदै गरेका उनीहरूको साथबाट ६/६ लाख नेपाली रुपैयाँ बरामद भएको जिल्ला प्रहरी कार्यालय पश्चिम नवलपरासीका सूचना अधिकारी इन्स्पेक्टर नारायण थापाले जानकारी दिए ।

इन्स्पेक्टर थापाका अनुसार मोटरसाइकलमा सवार उनीहरूले हुन्डी कारोबारको रकम ल्याएको सूचना पाएपछि सदरमुकाम परासीको बाइपास रोडबाट उनीहरूलाई पक्राउ गरिएको हो ।​

पक्राउ पर्नेमा नवलपरासी पाल्हीनन्दन गाउँपालिका– २ भक्सिपुरका सुखसागर यादव र प्रतापपुर गाउँपालिका–८ पिपरपातिका शिवेन्द्रप्रसाद बनिया रहेका छन् । यादवको साथबाट ५ सयका १२ सय थान नेपाली नोट गरी ६ लाख र बनियाको साथबाट ५ सयका नेपाली नोट २ सय र १ हजारका ५ सय थान नेपाली नोट बरामद भएको हो।

नगद बरामद भएपछि सोधपुछ गर्दा स्रोत खुलाउन नसकेका कारण उनीहरूमाथि हुन्डी कारोबारसम्बन्धी कसुरमा मुद्दा चलाइएको प्रहरीले जनाएको छ ।

हुन्डी कारोबार ठहर भएमा बिगो र सोबाट बढे वा बढाएको सम्पत्तिसमेत जफत गरी एक वर्षसम्म कैद हुने व्यवस्था छ ।