ट्रम्प-मोदी फोन वार्ता, के भयो कुराकानी ?

काठमाडौं। अमेरिकी राष्ट्रपति डोनाल्ड ट्रम्पले भारतीय प्रधानमन्त्री नरेन्द्र मोदीसँग फोन वार्ता गरेका छन् । सोमबार दुई नेताबीच फोनमा कुराकानी भएको भारतीय सञ्चारमाध्यमहरूले जनाएका छन् ।

कुराकानीपछि ह्वाइट हाउसले जारी गरेको विज्ञप्तिमा भनिएको दुई नेताहरूले अमेरिका र भारतबीचको सहयोगलाई सुदृढ पार्ने र बढाउनेबारे छलफल गरेको उल्लेख छ।

दुवैले इन्डो-प्यासिफिक, मध्य पूर्व र युरोपको पछिल्लो अवस्थाबारे छलफल गरेको बीबीसी हिन्दीले जनाएको छ । पारस्परिक हितका व्यावसायिक मुद्दामा पनि छलफल भएको समाचारमा उल्लेख छ । यसअघि प्रधानमन्त्री मोदीले ट्रम्पसँग फोनमा कुराकानी भएको बताएका थिए ।

यसअघि ट्रम्पको शपथ ग्रहणको एक दिनपछि भारतका विदेशमन्त्री एस जयशंकरले अमेरिकी विदेशमन्त्री मार्को रुबियोसँग कुरा गरेका थिए । मार्को रुबियोले अमेरिका आर्थिक मोर्चामा भारतसँग काम गर्न इच्छुक रहेको बताएका थिए।

शुक्रबार भारतीय विदेश मन्त्रालयका प्रवक्ताले भारतले अमेरिकासँग राम्रो र बलियो सम्बन्ध स्थापित गर्न प्रयास गर्ने बताएका थिए । अमेरिकी राष्ट्रपतिले मोदी फेब्रुअरीमा अमेरिकाको भ्रमण गर्ने अपेक्षा गरिएको बताएका छन् । यद्यपि भारतको विदेश मन्त्रालयले अहिलेसम्म यसको पुष्टि गरेको छैन ।