गाडी दुर्घटनामा मधेसका स्वास्थ्यमन्त्री घाइते, अवस्था सामान्य

जनकपुर । मधेस प्रदेशका स्वास्थ्य तथा जनसंख्यामन्त्री शत्रुधनप्रसाद सिंह सवार गाडी दुर्घटनामा परेको छ। दुर्घटनामा मन्त्री सिंहसहित तीनजना घाइते भएका छन्।

गएराति स्वास्थ्यमन्त्री सिंह सवार मधेस प्रदेश ०२-००१ झ-०१६५ नम्बरको गाडी खानेपानी डिभिजन कार्यालयको मधेस प्रदेश ०३-००१ झ-००९६ नम्बरको अर्को सरकारी गाडीमा ठोकिएर दुर्घटना भएको जिल्ला प्रहरी कार्यालय धनुषाका एसपी भुवनेश्वर तिवारीले जानकारी दिए। 

दुर्घटनामा घाइते भएका मन्त्री सिंहको जनकपुर प्रादेशिक अस्पतालमा उपचार भइरहेको छ । एसपी तिवारीका अनुसार मन्त्री सिंहसहित तीनैजनाको अवस्था सामान्य रहेको छ ।

उपचारमा संलग्न चिकित्सकले उनको स्पाइनल हड्डीमा चोट लागेको बताएका छन्। गएराति करिब साढे नौ बजे जनकपुरस्थित रामानन्द चोकमा दुई गाडी आपसमा ठोकिएका हुन्।

दुर्घटनामा मन्त्री सवार गाडीका चालक र सुरक्षाकर्मी पनि घाइते भएका एसपी तिवारीले बताए। दुर्घटनामा परेकाे गाडीकाे अगाडिकाे भागमा क्षति पुगेकाे छ।