जन्ती बोकेको बलेरो दुर्घटना, पाँच जना घाइते

काठमाडौँ । मदन भण्डारी राजमार्ग अन्तर्गत सिन्धुलीको दुधौली नगरपालिका-१, राँगेमा बिहीबार बिहान जन्ती बोकेको डबलक्याप बलेरो दुर्घटना हुँदा पाँच जना घाइते भएका छन् । मधेश प्रदेश ०३-००१ च. ८२०२ नम्बरको डबलक्याप बलेरो उक्त ठाउँमा अनियन्त्रित भई दुर्घटना हुँदा पाँच जना जन्ती घाइते भएका छन् ।

घाइते मध्ये एक जना गम्भीर र अन्य चार जनाको अवस्था सामान्य रहेको छ । सिन्धुलीको फिक्कल गाँउपालिका-१, जलजलेबाट उदयपुरको गाईघाट रातमाटे भन्ने ठाउँमा १० जना जन्ती सहित बेहुला लिएर जाँदै गरेको बलेरो सो ठाउँमा दुर्घट्ना भएको प्रहरीले जनाएको छ । प्रहरीका अनुसार दुर्घटना बेहुला हेमबहादुर विक सकुशल छन् ।

दुर्घटनामा गम्भीर चोट लागेका योगबहादुर खत्रीलाई उपचारका लागि सिन्धुली अस्पताल पठाइएको छ । अन्य चार जनाको दुधौली नगर अस्पताल सिर्थौलीमा उपचार भई रहेको छ ।

सामान्य घाइतेहरूमा श्याम विक, लालबहादुर विक, साने विक लगायतका छन् । चालक रोशन तामाङलाई प्रहरीले नियन्त्रणमा लिएको छ ।