एक्लै लडेर प्राप्त मत गुणात्मक रुपमा महत्त्वपूर्ण : कांग्रेस

काठमाडौं । नेपाली कांग्रेस उपनिर्वाचनको मतरिणामबाट सन्तुष्ट देखिएको छ । कुल ४४ मध्ये पदमध्ये कांग्रेसबाट १९ निर्वाचित भएका छन् । उपनिर्वाचन भएका स्थानमा कांग्रेसबाट यसअघि २७ जनाले जितेका थिए । दुई जिल्लामा जिल्ला समन्वय प्रमुख, एक पालिका प्रमुख र १९ वडाध्यक्ष कांग्रेसबाट निर्वाचित भएका छन् ।

यसपटक एक्लाएक्लै प्रतिस्पर्धा गर्दा प्राप्त गरेको मतपरिणामबाट कांग्रेस सन्तुष्ट देखिएको हो ।महामन्त्री विश्वप्रकाश शर्माले अरु दलहरूको वैशाखी टेकेर जितेको सिट भन्दा एक्लै लडेर जितेको सिट महत्त्वपूर्ण भएको बताए ।

‘अहिले निर्वाचन भएका २७ सिटमा धेरै ठाउँ गठबन्धनका बलमा जितेको ठाउँ थियो,’ शर्माले भने, ‘२०७९ र अहिलेको निर्वाचनमा के फरक छ भने अहिले आफ्नो तागतमा यो परिणाम आएको हो ।’

प्रारम्भिक समीक्षामा विज्ञप्ति मार्फत महामन्त्री विश्वप्रकाश शर्माले भनेका छन्, ‘ रिक्त ४४ मध्ये १९ स्थानमा नेपाली कांग्रेसका उम्मेदवार विजयी भए । समग्रमा यो ४३.१८ प्रतिशत हो । ०७९ मा गठबन्धन गरेर चुनाव लड्दा प्राप्त स्थान भन्दा एक्लै लडेर प्राप्त स्थान संख्यात्मक कम तर राजनैतिक, सांगठनिक र गुणात्मक रुपले बढी महत्त्वपूर्ण छ ।’

उपनिर्वाचन भएका पालिका प्रमुख, उप प्रमुख, अध्यक्ष र उपाध्यक्ष गरी कांग्रेसले ८ पद जितेको थियो । यसअघि जितेको मोरङको ग्रामथान अध्यक्ष, जाजरकोटको नलगाड उपप्रमुख, दैलेखको महाबु गाउँपालिकाको अध्यक्ष, दोलखाको गौरीशंकर र बाजुराको स्वामिकार्तिक खापरमा कांग्रेसले गुमाएको छ ।

गाउँपालिका उपाध्यक्ष गरी तीन नयाँ पदाधिकारी एमालेले लगेको छ । प्रमुख पदमा कांग्रेसले कीर्तिपुर मात्रै बचाएको छ ।०७९ मा विजय भएका केही स्थान हामीले गुमेको र अन्य दलले जितेका केही स्थानमा विजय हासिल गरेको महामन्त्री शर्माले बताए ।

उपनिर्वाचन परिचालन समितिका संयोजक समेत रहेका शर्मा भन्छन्, ‘लोकतन्त्रमा शतप्रतिशत स्थानमा जितको अपेक्षा लोकतान्त्रिक सोच हुन्न, तर जित र हार व्यहोरेका सबै स्थानको कारण र प्रवृत्तिको वस्तुगत समीक्षा आगामी चुनावी रणनीति निर्माणका लागि महत्वपूर्ण रहने हाम्रो निष्कर्ष छ । हामी यो गर्नेछौं ।’

अघिल्लो निर्वाचनमा माओवादी केन्द्र, एकीकृत समाजवादी, नेपाल समाजवादी लगायतका दलसँग कांग्रेसले चुनावी तालमेल गरेको थियो । पश्चिम रुकुम र पूर्वी रुकुममा कांग्रेस र एमालेले चुनावी तालमेल गरेका थिए ।

पश्चिम रुकुमको सानीभेरी वडा नम्बर ५ मा एमालेको बलमा कांग्रेसले वडाध्यक्ष जित्यो । पूर्वी रुकुम पृथा उत्तरगंगामा एमालेलाई कांग्रेसले समर्थन गरेको थियो ।