फरक-फरक स्थानमा डुबेर तीन जनाको मृत्यु

काठमाडौँ । बाराको आदर्शकोतवाल गाउँपालिका–८ बोहा टोलस्थित जमुनी खोलामा डुबेर सोही ठाउँ बस्ने राम नारायण प्रसाद कुशवाहाकी छोरी ५ वर्षीय सोहानी कुमारी कुशवाहाको सोमबार दिउँसो मृत्यु भएको छ ।

यता बाँकेको राप्ती सोनारी गाउँपालिका–६ बस्ने राजपती थारुको छोरा ९ वर्षीय कात्तिक थारुको बैजनाथ गाउँपालिका–२ स्थित बालुवा खोलामा डुबेर सोमबार दिउँसो मृत्यु भएको छ । नुहाउने क्रममा डुबेर अशक्त भएका उनको मेडिकल कलेज कोहलपुर बाँकेमा उपचारको क्रममा मृत्यु भएको हो ।

धनुषा मिथिला विहारी नगरपालिका–१ स्थित महरानी इट्टा उद्योग नजिक खेतमा रहेको पानी जमेको खाल्डोमा डुबेर गणेशमान चारनाथ नगरपालिका–२ लखनपुर घर भएका घुरन साहकी छोरी ७ वर्षीय रोमा साहको सोमबार दिउँसो मृत्यु भएको  छ । यस सम्बन्धमा प्रहरीले आवश्यक अनुसन्धान भइरहेको जानकारी दिएको छ ।