कतारी राजालाई काठमाडौँ बाहिर घुमाउने योजना सम्भव भएन : राजदूत ढकाल

काठमाडौँ । कतारका लागि नेपाली राजदूत नरेशविक्रम ढकालले कतारका अमिर (राजा) शेख तमिम बिन हमाद अल थानीको नेपाल भ्रमण अत्यन्तै उपलब्धिमूलक र सफल भएको बताएका छन् । बिहीबार काठमाडौँमा पत्रकार सम्मेलन गरी राजदूत ढकालले थानीले ३ दिन नेपाल भ्रमण गर्ने अपेक्षा गरिएकोमा व्यस्तताका कारण दुई दिन मात्र गर्न सकिएको बताए ।

विश्वमा विभिन्न खालका घटना भइरहेको अवस्थामा कतारका राजाले छोटो समय नेपालको भ्रमण गरेको उनको भनाइ छ । ‘कतारका राजा थानीलाई काठमाडौँ बाहिर समेत घुमाउने योजना रहेको थियो तर समय अभावका लागि त्यो सम्भव भएन’, राजदूत ढकालको भनाइ छ ।

कतारमा रहेका नेपाली श्रमिकको हक हितका लागि कतार सरकार गम्भीर रहेको भन्दै राजदूत ढकालले श्रम सम्झौतालाई समयानुकूल संशोधन गर्ने विषयमा अझै छलफल आवश्यक रहेकाले थप छलफल मात्रै टुङ्गोमा पुगिने बताए ।

राजदूत ढकालले अन्तर्राष्ट्रिय कानुनका केही प्रक्रिया नटुङ्गिएकाले तत्काल हात्ती उपहार दिन नसकिएको पनि बताए । ‘वन मन्त्रालयले यसमा आवश्यक प्रक्रिया पूरा गरेपछि चाँडै हात्ती पठाइन्छ’, राजदूत ढकालको भनाइ छ ।

मंगलबार नेपाल भ्रमणमा आएका कतारी राजा थानी नेतृत्वको प्रतिनिधिमण्डल बुधबार स्वदेश फर्किएको थियो । कतारका राजा थानीको नेपाल भ्रमणका क्रममा विभिन्न ८ वटा समझदारी र सम्झौता भएका छन् ।