ज्यान मार्ने उद्योगका फरार अभियुक्त पक्राउ

सफल खबर संवाददाता

आइतबार, १३ फागुन २०८०, १५ : १७
ज्यान मार्ने उद्योगका फरार अभियुक्त पक्राउ

काठमाडौं। ज्यान मार्ने उद्योगमा फरार रहेका एक जनालाई प्रहरीले पक्राउ गरेको छ । पक्राउ पर्नेमा मोरङका ३५ वर्षीय क्रान्ति बराइली भन्ने निलम विश्वकर्मा छन् । जिल्ला प्रहरी परिसर काठमाडौंको टोलीले उनलाई पक्राउ गरेर आज सार्वजनिक गरेको हो ।

२०८० कात्तिक २२ काठमाडौं महानगरपालिका वडा नम्बर १० बानेश्वरस्थित आइप्लेक्स मल नजिक नेपाल उसु महासङ्घका केन्द्रीय अध्यक्ष जनक बर्तौलालाई खुकुरी र रड प्रहार भएको थियो ।

जिल्ला प्रहरी परिसर काठमाडौंका प्रवक्ता प्रहरी उपरीक्षक नवराज अधिकारीले बर्तौलालाई धारिलो हतियार (खुकुरी र रड) प्रहार गरी घाइते बनाएको घटनाका मुख्य योजनाकारसमेत रहेका विश्वकर्मालाई पक्राउ गरिएको जानकारी दिए ।

प्रहरीले यसअघि उक्त घटनामा संलग्न बाँके कोहलपुरका २४ वर्षीय शेरबहादुर थारू, बाँकेकै २६ वर्षीय आशीष लामिछाने मगर र झापाका ३४ वर्षीय कैलाश भन्ने टेकबहादुर प्रधानलाई पक्राउ गरेर प्रहरी वृत्त बानेश्वरबाट म्याद थप गरी अनुसन्धान गरिरहेको प्रवक्ता अधिकारीले बताए ।

विश्वकर्माले बर्तौलालाई कुटपिट गर्नका लागि शेरबहादुर थारूलाई ५० हजार र टेकबहादुर प्रधानलाई दुई लाख रुपैयाँ दिएको अनुसन्धानमा खुलेको छ ।पक्राउ परेका विश्वकर्मालाई जिल्ला अदालतबाट म्याद थप गरी अनुसन्धान भइरहेको प्रहरीले जनाएको छ ।