विराटनगरमा शंकास्पद वस्तु फेला, दुई जना पक्राउ

विराटनगर । कोशी प्रदेशको राजधानी विराटनगर महानगरपालिका-३ मा विष्फोटक पदार्थ राखिएको जस्तो अवस्थामा प्रेसर कुकर फेला परेको छ । टेपले बाँधेको प्रेसर कुकर बेवारिस अवस्थामा भेटिएको हो ।

हिजो साँझ उक्त बस्तु देखिएपछि प्रहरी टोली सोही क्षेत्रमा बसेर निगरानी गरेको थियो । उक्त स्थान आसपास क्षेत्रमा आवतजावतमा रोक लगाएर निगरानी गरिएको हो ।उक्त शंकास्पद ‘कुकर बम’ डिस्पोज गर्न नेपाली सेनाको टोली परिचालन गर्ने तयारी भएको जनाइएको छ । सेनासँगको समन्वयमा उक्त शंकास्पद बस्तुबारे अनुसन्धान र आवश्यक परे डिस्पोज गर्ने तयारी भइरहेको मोरङ प्रहरीले जनाएको छ ।

उक्त शंकास्पद बस्तु राख्ने काममा संलग्न भएको आशंकामा प्रहरीले दुई जनालाई पक्राउ गरेको छ । पक्राउ परेकाहरू यसअघि नेत्रविक्रम चन्द विप्लव समूहमा आबद्ध रहेको खुले पनि उनीहरुबारे विस्तृत विवरण प्रहरीले सार्वजनिक गरेको छैन ।

उनीहरूले विप्लव समूहबाट अलग भएर विद्यालय र अरु संस्थाहरूमा चन्दा आतङ्क मच्चाइरहेको प्रहरीले अनुसन्धानबाट पत्ता लगाएको छ ।