छुट्टाछुट्टै सवारी दुर्घटनामा पाँच जनाको मृत्यु

काठमाडौं । छुट्टाछुट्टै सवारी दुर्घटनामा पाँच जनाको मृत्यु भएकाे छ । काठमाडौं महानगरपालिका-३२ जडिबुटीस्थित सडकमा बा.प्र.०२-००२ प ८४९६ नम्बरको मोटरसाइकलको ठक्करबाट पैदलयात्री सोही ठाउँ बस्ने ओखलढुंगा चम्पादेवी गाउँपालिका-१ घर भएका छविलाल मगरकी छोरी ११ वर्षीया लक्ष्मी मगरको शनिबार साँझ मृत्यु भएको छ । दुर्घटनामा गम्भीर घाइते भएकी उनको ट्रमा सेन्टरमा उपचारको क्रममा मृत्यु भएको हो । साथै सोही मोटरसाइकलको ठक्करबाट घाइते भएका १ जना पदैलयात्रीलाई सिभिल अस्पताल हुँदै थप उपचारको लागि न्यूरो अस्पताल माइतीघर लगिएको छ । मोटरसाइकल चालकलाई प्रहरीले नियन्त्रणमा लिएको छ ।

स्याङजा, गल्याङ नगरपालिका-१ नब्बेस्थित सिद्धार्थ राजमार्गमा लु.१ ख ५१४३ नम्बरको ट्रक र लु.३८ प २४४५ नम्बरको मोटरसाइकल एकआपसमा ठक्कर खाई शनिबार दिउँसो दुर्घटना हुँदा मोटरसाइकल चालक गल्याङ नगरपालिका-२ गराङदी बस्ने ४३ वर्षीय दिपक थापाको मृत्यु भएको छ । दुर्घटनामा गम्भीर घाइते भएका उनको प्राथमिक स्वास्थ्य केन्द्र वालिङमा उपचारको क्रममा मृत्यु भएको हो । ट्रक चालकलाई प्रहरीले नियन्त्रणमा लिएको छ । 

ओखलढुङ्गा, सिद्धिचरण नगरपालिका-११ देउरालीस्थित सडकमा ना.५ त ८९२५ नम्बरको ट्याक्टरको ठक्करबाट पैदलयात्री मोलुङ गाउँपालिका-२ बस्ने ५२ वर्षीय गजेन्द्र राईको घट्नास्थलमै शनिबार साँझ मृत्यु भएको छ । ट्याक्टर चालकलाई प्रहरीले नियन्त्रणमा लिएको छ।

कञ्चनपुर, लालझाडी गाउँपालिका-६ चानदेव ढक्कास्थित सडकमा सु.प.प्र.०१-००२ त ७०१३ नम्बरको ट्याक्टरको ठक्करबाट सोही गाउँपालिका-६ ढक्का बस्ने भुपेन्द्र सिंहकी छोरी १० वर्षीया अमृता सिंहको घटनास्थलमै शनिबार दिउँसो मृत्यु भएको छ । ट्याक्टर चालकलाई प्रहरीले नियन्त्रणमा लिएको छ ।

बर्दिया, मधुवन नगरपालिका-३ गम्कास्थित सडकमा भे.१० प ७९३५ नम्बरको मोटरसाइकल गोरुगाडामा ठक्कर खाई शनिबार साँझ दुर्घटना हुँदा मोटरसाइकल चालक मधुवन नगरपालिका-८ लालिबजार बस्ने २२ वर्षीय अर्मान अन्सारीको मृत्यु भएको छ । दुर्घटनामा गम्भीर घाइते भएका उनको बर्दिया अस्पताल गुलरीयामा उपचारको क्रममा मृत्यु भएको हो । गोरूगाडा चालकलाई प्रहरीले नियन्त्रणमा लिएको छ । दुर्घटनामा सम्बन्धमा प्रहरीले आवश्यक अनुसन्धान गरिरहेको छ ।