मधेश प्रदेश सभामा सातवटै संसदीय समितिले पायो पूर्णता

काठमाडौँ । मधेश प्रदेश सभामा सातवटै संसदीय समितिको सभापति चयनले पूर्णता पाएको छ । बाँकी २ संसदीय समितिको सभापति चयन भएपछि संसदीय समितिले पूर्णता पाएको हो ।

बाँकी रहेको प्रदेश मामिला समितिको सभापतिमा नेकपा एकीकृत समाजवादी पार्टीबाट रतनेश्वर गोईत यादव र कृषि तथा भूमि व्यवस्थापन समितिको सभापतिमा काँग्रेसका सञ्जय कुमार महतो निर्विरोध सभापति चयन भएको प्रदेशसभा सचिवालयले जनाएको छ ।

यसअघि २ असारमा अन्य पाँच दलबाट पाँचवटा संसदीय समितिको सभापति सहमति मै चयन गरिएको थियो । सार्वजनिक लेखा समितिको सभापतिमा प्रमुख प्रतिपक्षी नेकपा एमालेकी मञ्जु थापा, विकास समिति सभापतिमा जसपाका शारदा सङ्करप्रसाद कलवार, महिला बालबालिका तथा सामाजिक न्याय समितिमा लोसपाकी रुपा कुमारी यादव, अर्थ तथा योजना समितिमा सतिशकुमार सिंह र प्राकृतिक स्रोत तथा वातावरण समितिमा माओवादी केन्द्रकी शारदा पहाडी सभापति चयन भइसकेका छन् ।

प्रदेश सभामा एक बढी सांसद रहेका ७ दलले एक-एकवटा संसदीय समिति लिने सहमति भएपछि सभापति चयन गरिएको हो ।