रकम हिनामिना गरेको आरोपमा वन उपभोक्ता समूहका अध्यक्षसहित ३ जनाविरद्ध भ्रष्टाचार मुद्दा दायर

काठमाडौं। अख्तियार दुरुपयोग अनुसन्धान आयोगले काभ्रेपलाञ्चोकको एक वन उपभोक्ता समितिका अध्यक्षसहित ३ जनाविरुद्ध भ्रष्टाचारको मुद्दा दायर गरेको छ ।भुम्लु गाउँपालिका वडा नं. ४ स्थित धारापानी हिले सामुदायिक वन उपभोक्ता समूहका अध्यक्ष चन्द्रसिंह लामा, सचिव संगीता चौलागाईं र कोषाध्यक्ष माधवप्रसाद चौलागाईंविरद्ध अख्तियारले बुधवार विशेष अदालत, काठमाडौंमा भ्रष्टाचारको मुद्दा दायर गरेको हो ।

उपभोक्ता समूहका अध्यक्ष लामासहित ३ जनाले आफूखुसी समूहको रकम खर्च गरी हिनामिना गरेको आरोप अख्तियारले लगाएको छ ।अध्यक्ष लामासहित ३ जनाले उपभोक्ता समूहको बैंकमा रहेको खाताबाट ९ लाख १३ हजार २८० रुपैयाँ ९० पैसा निकालेको अख्तियारले जारी गरेको विज्ञप्तिमा उल्लेख छ ।

यो काम बदनियतपूर्ण र नियमविपरीत भएको अख्तियारले जनाएको छ । 

‘उनीहरूले भ्रष्टाचार निवारण ऐन, २०५९ को दफा १७ बमोजिमको कसुर गरेको हुँदा बिगो ९ लाख १३ हजार २८० रुपैयाँ ९० पैसा कायम गरी बुधवार विशेष अदालत, काठमाडौंमा आरोपपत्र दायर गरिएको छ,’ अख्तियारमा प्रवक्ता भोला दाहालले जारी गरेको विज्ञप्तिमा भनिएको छ ।