निर्मला हत्या प्रकरण : मानसिक अवस्था ठिक नभएका विष्ट वास्तविक हत्यारा नभएको भन्दै गरिएको विरोधमा प्रहरीको हस्तक्षेप

तेह्र वर्षीया बालिका निर्मला पन्तको हत्याबारे प्रहरीले वास्तविकता बाहिर ल्याउन नसकेको भन्दै स्थानीयवासीले आज भीमदत्तनगर बजार बन्द गराएका छन् ।
बजार बन्द गराएर विरोध प्रदर्शनमा उत्रिएका आन्दोलनकारीमाथि प्रहरीले हस्तक्षेप गरेको छ ।  वास्तविक हत्यारालाई पत्ता लगाई कारवाहीको माग गर्दै गरिएको प्रदर्शनमा प्रहरीले  ८ राउण्ड अश्रुग्यास प्रहार गरेको छ । आक्रोशित भीडले प्रहरीको भ्यानलाई समेत घेरेका थिए ।
प्रहरीले सोमबार निर्मलाको बलात्कारपछि हत्यामा संलग्न रहेको आरोपमा भीमदत्तरपालिका १९ बाँगफाँटाका ४१ वर्षीय दिलिप सिंह विष्टलाई सार्वजनिक गरेको थियो ।
तर, मानसिक अवस्था ठिक नभएका विष्टलाई प्रहरी ‘नक्कली’ अभियुक्त बनाएर सार्वजनिक गरेको भन्दै स्थानियले विरोध गरेको हुन् ।

विष्टले निर्मलाको बलात्कारपछि हत्या गरेको स्वीकार गरेका प्रहरीको दाबी छ । प्रहरीको दाबीमाथि अविश्वास गर्दै सर्वसाधारणले मुख्य अभियुक्तलाई बचाउन मानसिक सन्तुलन ठिक नभएका व्यक्तिलाई अभियुक्त देखाइएको आरोप लगाइरहेका छन् ।