एमसीसीबारे एकीकृत समाजवादीले माग्यो सरकारसँग जवाफ

काठमाडौं । सत्तारुढ दल नेकपा एकीकृत समाजवादीले अमेरिकी नियोग मिलेनियम च्यालेञ्ज कर्पोरेशन (एमसीसी) सम्झौताबारे  सरकारसँग जवाफ मागेको छ । 

एकीकृत समाजवादीले एमसीसी कार्यान्वयनको अवस्थाबारे जवाफ मागेको हो ।  एकीकृत समाजवादीका उपमहासचिव तथा प्रवक्ता जगन्नाथ खतिवडाले सचिवालय बैठकको निर्णय सार्वजनिक गर्दै एमसीसी कार्यान्वयनबारे अहिलेसम्म  भएका कामबारे सरकारसँग जानकारी माग्ने बताए । 

प्रवक्ता खतिवडाले एमसीसी सम्झौता कार्यान्वयनमा व्याख्यात्मक घोषणा अनुरुप नेपालको हित रक्षाको प्रत्याभूति गर्न संसदीय अनुगमन समिति गठनका लागि आवश्यक पहल गर्ने निर्णय भएको समेत जानकारी गराए ।  ‘त्यसको निरन्तर जानकारी लिने प्रयोजनका लागि पार्टीका तर्फबाट समेत अनुगमन समिति बनाउने सचिवालय बैठकले निर्णय गरेको छ’ उनले भने। 

एकीकृत समाजवादी भ्रष्टाचारविरुद्धको अभियानलाई निरन्तरता दिने भएको छ । एकीकृत समाजवादीले भूटानी शरणार्थी प्रकरण छानविनदेखि नै विभिन्न प्रकारले भ्रष्टाचारविरुद्ध अभियान  संचालन गर्दै आएको छ । 

भूटानी शरणाथीदेखि सुन प्रकरणसम्म सरकारी सक्रियताले जनातामा आशा जगाएको एकीकृत समाजवादीको ठहर छ ।