संघीय लोकतान्त्रिक गणतन्त्र संस्थागत हुँदै गएको छ : प्रधानमन्त्री प्रचण्ड

कास्की। प्रधानमन्त्री पुष्पकमल दाहाल ‘प्रचण्ड’ले संघीयता कार्यान्वयनको जिम्मेवारी तीब्रता र व्यवस्थित रूपमा अगाडि बढाउन सातै प्रदेशका मुख्यमन्त्रीहरूलाई आग्रह गरेका छन् । शुक्रवार पोखरामा आयोजित अन्तर प्रदेश मुख्यमन्त्री बैठकको उद्घाटन समारोहलाई सम्बोधन गर्दै प्रधानमन्त्री प्रचण्डले संघीयता कार्यान्वयनको जिम्मेवारी व्यवस्थित रूपमा अगाडि बढाउन मुख्यमन्त्रीहरूलाई आग्रह गरेका हुन् । 

‘नेपालको संविधान जारी भएपछि दोस्रो पटक आयोजना भएको बैठकले देशमा संघीय लोकतान्त्रिक गणतन्त्रलाई थप सुदृढ गर्न र प्रदेश प्रदेशबीचको सम्बन्धलाई सबल बनाउन महत्वपूर्ण भूमिका खेल्न सक्ने मेरो विश्वास छ,' उनले भने, 'अढाइ शताब्दी लामो एकात्मक राज्यप्रणालीमा अभ्यस्त हाम्रा लागि संघीय शासन प्रणाली नितान्त नौलो अभ्यास थियो।

संविधानले व्यवस्था गरेअनुरूप सहकारिता, सहअस्तित्व र समन्वयको सिद्धान्तमा आधारित संघीय शासन प्रणालीको सुसञ्चालन हाम्रा लागि चुनौतीपूर्ण नै थियो । तर, तीनै तहमा चुनिएर आउनुभएका जनप्रतिनिधिहरू सीमित स्रोतसाधनको सुझबुझपूर्ण ढङ्गले परिचालन गर्दै विकास निर्माणका कामलाई अघि बढाउँदै जनताका आकांक्षा पूरा गर्न क्रियाशील रहनुभएकाले व्यवस्था संस्थागत हुँदै गएको छ।'संविधान जारी भएको झण्डै सात वर्षको अवधिमा उत्साहजनक उपलब्धि हासिल गरेको उनले बताए ।