गणतन्त्रमा जनताले बढी अपेक्षा गर्नु स्वाभाविक हो : प्रकाश ज्वाला

काठमाडौँ । भौतिक पूर्वाधार तथा यातायात मन्त्री प्रकाश ज्वालाले गणतान्त्रिक व्यवस्थामा जनताले अपेक्षा गरे जति काम गर्न नसकिएको स्वीकार गरेका छन् । सरकारले रेशम चौधरी सहित १८ जनालाई कैद मिनाहा गरेपछि बोल्दै ज्वालाले जनताले अपेक्षा गरे बमोजिम काम पूरा गर्न नसकिएको बताए । 

‘हामीले गर्ने राम्रा कामहरू ओझेलमा हुन्छन् । नराम्रा कामहरू बढी प्रचार हुन्छन् । गणतन्त्रको भावना अनुसार जनताले जति अनुभूति गर्नुपर्ने हो । त्यो हुन हुन सकेन’ ज्वालाले भने, ‘गणतन्त्रमा जनताले बढी अपेक्षा गर्नु स्वाभाविक हो । आन्दोलन भयो, क्रान्ति भयो, बलिदान भयो । आफ्नो जीवन उत्सर्ग गरेर गणतन्त्रको मूल्य जति उचाइमा हुनुपर्ने हो त्यो हुन नसकेको स्वविभाक हो ।’ 

जनताले परिवर्तनको अनुभूति गर्ने गरी आधारभूत आवश्यक समेत पूरा गर्न नसकिएको  ज्वालाले बताए ।  ‘राजनीतिक अस्थिरताले संविधान कार्यान्वयन गर्ने सवालमा, प्रतिगमन सच्याउने सवालमा, यो व्यवस्था बलियो बनाउन लाग्नुपर्ने भयो ।  गणतन्त्रमा जनजीविकाको सवाल समेत पेचिलो भयो’ उनले भने, ‘हामीले राजनीतिक परिवर्तनलाई सुनिश्चित गर्यों । आर्थिक परिवर्तनबाट जनतालाई राहत, सेवा सुविधा दिन लाग्नुपर्ने छ ।’ व्यवस्था परिवर्तन भई सकेकाले जनताको अवस्था परिवर्तन गर्न सबै लाग्नुपर्ने ज्वालाले बताए ।