विधान अधिवेशनको तयारीमा जसपा, बहसमा पहिचानको मुद्दा

काठमाडौं । जनता समाजवादी पार्टी (जसपा) नेपालको गत पुस १८ र १९ गते सम्पन्न राजनीतिक समितिको बैठकले पार्टीको विधान अधिवेशन गर्ने निर्णय गर्‍यो । विधान मस्यौदा समितिले अहिले आफ्नो कामलाई तीव्रता दिएको छ । 

विधान अधिवेशन मूलरुपमा पार्टीले उठाएको पहिचानको मुद्दा र साङ्गठनिक संरचनाबारे केन्द्रित हुने समितिले जनाएको छ । जसपाको हालको विधानमा केन्द्रीय, प्रादेशिक र स्थानीय तहका विभिन्न साङ्गठनिक संरचनाहरूको व्यवस्था छ ।

खासगरी पहिचानमा आधारित लिम्बुवान, किरात, मधेश, शेर्पालुङ, नेवा, ताम्सालिङ, मगरात, तमुवान, थरुहट, खसान र दलित-शिल्पीविशेष ९१०ं१० राष्ट्रिय समितिहरू र सातवटा प्रदेशस्तरीय संरचना (जसपाले भन्ने गरेको प्रशासनिक संरचना) बीच शक्तिको बाँडफाँट र अधिकार क्षेत्रका बारेमा नेताहरुबीच फरक धारणा छन् । 

यी दुई खाले संरचनामध्ये राजकीय मामलामा हाल जसपाले प्रदेशस्तरीय समितिलाई कार्यकारी र पहिचानमा आधारित राष्ट्रिय समितिलाई समन्वयकारी हैसियत प्रदान गरेको छ ।

समग्रमा पहिचानको मुद्दाबारे पुनर्विचार गरौँ भन्ने आवाज पार्टीभित्र उठ्न थालेको छ । यस अर्थमा पहिचानको मुद्दा जसपाको विधान अधिवेशनको पेचिलो विषय बन्ने देखिन्छ ।  पार्टीले चैत्रसम्ममा विधान अधिवेशन गर्ने तयारी थालेसँगै विभागहरुले अभिलेख सङ्कलनको कामलाई तीव्रता दिएका छन् ।