राष्ट्रपति भण्डारी स्वदेश फिर्ता

काठमाडौं । राष्ट्रपति विद्यादेवी भण्डारी आइसल्याण्डको औपचारिक भ्रमण पूरा गरी शनिवार बिहान स्वदेश फिर्ता भएकी छन् । 

महिला राजनीतिज्ञको विश्वव्यापी सञ्जाल ‘वुमन पोलिटिकल लिडर्स’ (डब्ल्यूपीएल) को कार्यक्रममा सहभागी हुन राष्ट्रपति भण्डारी कात्तिक २१ गते आइसल्याण्ड गएकी थिइन् ।

राष्ट्रपति स्वदेश फर्किँदा स्वागतका लागि उपराष्ट्रपति नन्दबहादुर पुन, प्रधानमन्त्री शेरबहादुर देउवा, राष्ट्रियसभाका अध्यक्ष गणेश तिमल्सिनालगायत विमानस्थलमा पुगेका थिए ।  

भ्रमणका क्रममा आइसल्याण्डको राजधानी रेक्याभिकमा आयोजना भएको कार्यक्रममा उनले विशेष सम्बोधन समेत गरेकी छन् । उनले ‘वुमन पोलिटिकल ट्रेलब्लेजर अवार्ड’ समेत ग्रहण गरेकी थिइन् ।