बढुवा नगरेको भन्दै नबिल बैंकका कर्मचारीको विरोध, माग पुरा नभए आन्दोलन गर्ने चेतावनी

काठमाडौं । नेपाल बङ्गलादेश बैंकलाई प्राप्तिपश्चात् नबिल बैंकका कर्मचारीहरुलाई यथास्थितिमा नै राखेको भन्दै नबिल बैंक कर्मचारी संघले विरोध जनाएको छ । एनबी बैंकलाई प्राप्तिपश्चात् कर्मचारीको बढुवा नगरेको भन्दै विरोध जनाएको नबिल बैंक कर्मचारी संघका अध्यक्ष सबिन भट्टराईले जानकारी दिए ।

नबिल बैंकले नेपाल बङ्गलादेश बैंकलाई प्राप्ति गरी एकीकृत कारोबार गर्ने तयारीमा रहेको छ । तर एनबी बैंक प्राप्तिपश्चात् नबिल बैंकमा हाल कार्यरत सम्पुर्ण कर्मचारीहरुको क्षमता दक्षता बढ्नु पर्ने भएपनि वृत्ति बिकासमा पछि परेको भन्दै संघले खेद प्रकट गरेको हो ।

लामो समयदेखी अग्रणि भुमिका निर्वाह गरिरहेको बैंकका कर्मचारीको वृति विकासमा हदैसम्मको शंकुचन रहेकाले समायोजन गर्दा कर्मचारीको मनोबल र मनोदशा के हुन जान्छ ? भनि प्रश्न समेत गरेको छ ।

कर्मचारीको मनोबल बढाउन सेवा सुविधाको वृद्धि र नगन्य खर्चलाई गौण ठानी प्रसन्न जनशक्ति नै बैंकको पुँजी भएकाले बढुवाको रोलक्रममा रहेका स्तरको सिमा छोइसकेको कर्मचारीको हकमा २ तह र अन्यको हकमा १ तह स्वतः बढुवा गरी न्यायीक र भावनात्मक रुपमा यथोचित सम्बोधन गर्न संघले कडा आग्रह गरेको छ ।

यदि कर्मचारीको वृद्धि विकासमा अपमानजनक र दुरगामि वृत्ति विकासमा अवरोध गर्ने कार्य जारी राखेमा वा माग पुरा नगरेमा तत्काल आन्दोलनको कार्यक्रम घोषण गर्ने संघले चेतावनी समेत दिएको छ ।